انا البارح على كوعي واردد ماطولك ياليل=اثر ليل السهر طوله على من عد ساعاته
اهوجس في هموم سجلت في خافقي تسجيل=يتابعها عليل القلب ويغير محطاته
محطات كثيره مالها موجز ولاتحليل=رسيفرها بوسط القلب والموجات موجاته
ليا جيت العلوم اللي ثلاث ارباعها تهويل=قفلت الدش والغيته ولا اتابع قناواته
علوم كلها دجل وخديعه مثل كذب ابريل=ياليت الراوي يجيب الحقايق في رواياته
ولو مافيه بالدنيا شقى كان استراحت حيل=قلوب همها من هالزمان وكثر نكباته
وانا شاعر واعبر عن همومي مع شباب الجيل=من الشعار وتعبر بيوته عن معاناته
عسى شط الفرات يصير بكره مثل شط النيل=ويرجع جمه الصافي وتكثر فيه خيراته
وترى ماتكمل نجوم السما من غير نجم سهيل=ويعود النجم الاقصى في سماه وفي مداراته
وعسى الله يحفظ بلادي من اهل المكر والتظليل =وتسلم لي يدين اللي رفع مجده وراياته
يدين ملوكنا حكامنا اللي يعدلون الميل=مكان الشعب وسط القلب ومحقق طموحاته
حماة الدين والمله ولاتنظر لقال وقيل=لهم منهاج سامي ماتغير عن بداياته
على النهج السليم ولاتبع شبهه ولاتمثيل=طريق واضح للناس مقصوده وغاياته
رسمه اللي زرع فينا التسامي مثل زرع الهيل=عسى الله يرحمه ويحط قبره وسط جناته
وانا لاضقت اداوي ضيقتي في كثرة التهليل=متابع ذكر ربي هو دوى قلبي واهاته
هو اللي عالم مافالضمير من الشقى والويل=ولاضاقت على من ينتظر من نفح رحماته