قبيلة بني رشيد

يا ذيب ياللي نايم صح نومك

* المنتوي فرس الغنم ما ينومي

ياليل يا غربيب غابت نجومك

* والنو قوض في مغيب النجومي

مشتبه ما بين عربك ورومك

* الله يطفيها بوبل الغيومي

يا وقت ياماشوم ما أكثر همومك

* على الرجال اللي تعرف السلومي

قرنس غرابك واعتلى الوكر بومك

* ثعالبك عدت طوال الرجولي

تقضي حياتك ما نقضى لك لزومك

* كم ليث غاب ما نقضى له لزومي

لوك من الادناس بيض هدومك

* تعيف ما تلقى نظيف الهدومي

في وقتنا حتى الثعالب تهومك

* ياللعجب كيف الثعالب تهومي

عصر مضى ياثوب ما أوسع كمومك

* ما طاب لك لو طاب لك ما يدومي

يا مشتكي من حاضرك ما نلومك

* ما يلحق اللي يشكي الميل لومي

ما شفت ما عاينت طابت علومك

* ابكار عفرٍ ما عليها وسومي

علمي بها يوم انت تسرج قحومك

* يومك على الشطه قوي العزومي

أيام نفسك للمعالي تزومك

* عند الطراد وعند لطم الخشومي

سنين قومي تختلف هي وقومك

* وجمل خليف مقيد ومخطومي

دنيا بها تفلجك ظلم خصومك

* يهان المعرب والهجين محشومي

تعض فيها من نكدها بهومك

* يفطر بها ناس وناس تصومي

قلت صناديدك وقلت قرومك

* تنباع باول سومة من يسومي

ابعد عن الشوان يا ذيب حومك

* الجو عقبك صاير به سمومي

متخالط يا وقت وردك وثومك

* أكبر غلط لا خالط الورد ثومي

كد الجمل والحم بضدك سهومك

* يا معفي الحمرا الفتاة الردومي

والخاتمة يا وقت ما أكثر رخومك

* كلبك عوى والذيب شبه معدومي

اسم القصيده وشاعرها :
" صح نومك "
الشاعر / عبدالله بن صقيه التميمي
قصيده جزله يستاهل عليها ملايين .