بسم الله الرحمن الرحيم

السلام عليكم ورحمة الله وبركاته

مما خلده التاريخ وقد ثبت تواتراً ,قصة دباس وابوه

وكلهم شعار دواهي..

والقصه تقول

انه كان فيه رّجال دوسري اسمه محمد (وقيل راشد) وكانت مضاربه حول الخرج!!!! وكان راعي حلال ومال وامره مطاع

في قبيلته وهو منصى للضيوف والمتخاصمين وله ميقاف يهول دون العدى
.............
وجاله ولد وسماه ((دباس)) وعقبه بنتين..وبعدها ماتت زوجته(ويقال انها ماماتت لكن ابو دباس عافها)
........................
المهم ان الرجّال تزوج حرمه ثانيه وهذا الشي زعل دباس اللي كان فالعشرينات..

وكل شوي والزعل من زياده في زياده وهو يشوف ان ابوه معطي زوجته الجديده اكثر من حقها وانه يصدقها ويسمع

كلامها فيه و..و..
.................
الوكاد ان دباس قرر يجلي عن ابوه..ويقولون الرواه انه راح للعراق وبعضهم يقول انه استقر في ايران...

وايّا كان فان الديره اللي استقر فيها كانت ديار شيعه

الوكاد مرت الايام وكبر ابو دباس...وكان لحرمته الجديده اخوان واجد

وكانوا يبغون البنات (خوات دباس) وعيّا الشايب وجا بينهم مقاشر وراحوا ارحامه يذونه مع كل درب وكلما كبر وضعف

ازدادوا قوه وظلم..

لين راحوا يقطعون الما عن بلاده(مزرعته) ويتصرفون في حلاله ويزحمونه في الطريق ...

لين شاف منهم الذل ...وكانوا اذا شب ناره يرسلون له من يطفيها ويهينه ويمسح رمادها على وجهه
......................
وراحوا يطلعون اشاعات عن دباس ..انه فالّها في ديار الشيعه

وانه جالس يعربد ويشرب الخمر ويجلس مع المغنين واهل الطرب وانه فاسد..
................
الوكاد ان الشايب ضاقت به الارض وكان دباس قد صارله ثمان سنين غايب

ولولا انه يخاف على بناته من اذى ارحامه كان سافر يدوّر ولده

وليله من الليالي ويتهيض الشايب من غيبة دباس ومن حالته وهو يهل العباير والقصيد (64بيت)..

وهو يجهز هاك المطيه (او مطيتين) ويرسل عليها هاك النشمي (ويقال اثنين)المهم..

وقالهم دوروا دباس وعطوه الرساله وليا عطيتوها اياه ترى المطايا لكم

الوكاد سروا النشامى لين جوا البصره ونشدوا عنه وانه وراها ..المهم انهم لقوه وعلموه بحال ابوه وعطوه الرساله

واسمعوا وش لقى فيها...بالله اسمعوا




يـاونـة(ن) ونّيتـهـا مــن خـــوا الـــراس// مــن لاهــب(ن) بالكـبـد مـثـل السعـيـره

ونيـن مـن رجلـه غــدت مـثـل مـقـواس//ويــونّ تـالـي الـلـيـل يـشـكـي الجـبـيـره

ويـامــلّ قـلـبـي مـثــل بـــن ٍ بمـحـمـاس//ويــا هِـشْـم حـالــي هَشـمـهـا بالنـجـيـره

ويـا وجـد حـالـي يـامـلا وجــد غــرّاس//يـوم اثـمـرت واْشـفـا صـفـا عـنْـهْ بـيـره

من ثَمْرْ قلبـي اللـي سـرا هجعـة النـاس//متـنـحـر ٍ درب ٍ عـســى فـيــه خــيــره

الله يـفـكـه مـــن بـــلا ســـو الاتــعــاس//ومــن شـــر عـبـثـات اللـيـالـي يـجـيـره

فــي ديــرة ٍ تقطـعـت عـنــه الارمـــاس//سـبـعـيـن يــــوم ٍ لـلـركـايـب مـســيــره

لا والله الا حـــال مـــن دونـــه الـيــاس//حَـــط ّ الـبـحـر والـبــر دون الـجـزيـره

هذي ثمان (ا)سنين من رحت يَ ادبـاس//لَ ارسـالــة ٍ جـتـنـي ولا مـــن بـريــره

يَ ادباس من عقبك تـرى البـال محتـاس//وعلـيـك دمــع الـعـيـن حـــرّق نـظـيـره

وعليـك كنّـي فـي دجــا اللـيـل حــراس//اصـبـح عـلـى حيـلـي وعيـنـي سـهـيـره

اصبحـت انـا مابيـن طــاري وهـوجـاس//وطـــواري ٍ تــطــري عـلـيـنـا كـثـيــره

متحـيّـر ٍ مــن عيـلـة البـيـت يَ ادبـــاس//ارجــي ثــواب الله واخـــاف المـعـيـره

اخـاف مـن حكـي العـدى ثـم الانـجـاس//اهـــل الحـكـايـا الـطـايـلـه والـقـصـيـره

ويقـال خــلا عيلـتـه عــن نــزا الــراس//واقـفــا وخـــلا عـيـلـةٍ لــــه صـغـيــره

والا فَ انــا يـابـوك قـطّـاع الارمـــاس//مــا نـــي بمـثـبـور ٍ ورجـلــي كـسـيـره

آصلـك لـو دونـك نِبـا حمـر الاعـطـاس//الـصـلـب والـصـمـان دروبٍ عـسـيــره

مـهـالــكٍ مــــداركٍ مـابــهــا اونـــــاس//غـيـر الثـعـل والـبـوم تـسـمـع صـفـيـره

لـو كنـت فـي نـزوا وديــرة بـنـي يــاس//اهـــل الـمــوازي والـوجـيــه الـغـبـيـره

عــبّــادة الاصــنــام شــرّابــة الــكــاس//والـخـمــر والـتـنـبـاك فـيـهــا وغــيــره

لَ اركب على وجنا ً من الهِجْنْ عرماس//فـجّ النحـر يَ ادبــاس حـمـرا الظهـيـره

متـروسـة الفخـذيـن مـزبــورة الـــراس//كـنّ الـخْـلاص (ا)عيونـهـا يــوم اديــره

فـيـهـا شِـبَــهْ رِبْـــدٍ تـخـفّـق بـالاونــاس//وان (ا)رفـعــت جنـحـانـهـا مـسـتـذيـره

تنشـر مـن العُـوده علـى ريـح الانـفـاس//عـنـد الفـجـر واللـيـل مـجـفـى مـريــره

والعصْـر بالصمـان تسمـع لهـا ضـراس//حـبـل الـرّسـن خَـطْـر ٍ تـبـتِّـر جـريــره

و(ا)نْـهـار ثـالـث بـيـن حِـمّـا والاوراس//وآرآ يـمـامـك جِـعْـلـهـا لــــك سـفـيــره

ثـم اركــب (ا) بساجـيّـةٍ تقـلـب الــراس//تـمـشـي بـهـلـهـا فـالـبـحـور الـغـزيــره

الى مدى (الفيحـاء) بهـا الخيـر محتـاس//لــولا الكـفـر والـشــرك يـاهــيّ ديـــره

عــزّ الله انْـهــا ديـــرةٍ مـالـهـا اجـنــاس//لــــولا بــهــا يِـعْـبَــد مــــع الله غــيــره

لـولا بهـا يشْـرَك ب(عـلـي) و(عـبـاس)//وتلـقـى بـهـا (الـفـاروق) سـبّـه بـريــره

هـي ديـرة اللـي بـاغـي ٍ كيـفـة الــراس//ولا حــدن هـمــه مـــن الـنــاس غـيــره

هَيس (ا) بـذرا الاجواد للصّحْفْ لحـاس//يـفــرح لـيــا نـيــدي لــذبــح الـعـجـيـره

يَ ادباس مايصبـر علـى البـق والحـاس//الا الــــذي مــالـــه بـنــجــدٍ عـشــيــره

وذا ماقـفـك يَ ادبــاس مافـيـه نـومــاس//يـصـلـح لْـقِـيـن ٍ مهـنـتـه طـــق زيــــره

هِـمّ انهـض العيـرات مــع كــل فــرّاس//يَ ادبـــــاس دوّر خــيّـــر ٍ تـسـتـشـيـره

جــدّك وعمـانـك هــل الـعـزم والـبــاس//اهـــل الــلــوازم مـكـمـديـن الـقـصـيـره

يَ ادبــاس قلـبـي كــل مـاهـب نسـنـاس//شـرقــيــةٍ ولّـــــع بـقـلــبــي ســعــيــره

و(ا)غصـون قلبـي يافتـى الجـود يـبّـاس//غـــادي انـــا يـابــوك كــنّــي هـشـيــره

والـحـال يـافـرز الـوغـى مـسّـه الـبـاس//عـلـيـك يـــا نــطّــاح وجــــه الـمـغـيـره

عشريـن عـام ٍ كلّـه ارجـيـك يَ ادبــاس//مـثــل الـغـريـر الـلــي تـولّــع بـطـيــره

يَ ادبــاس انــا يـابـوك مانـيـب بـــلاّس//لــكـــنّ عــيـــلات الـرفــاقــه كـثــيــره

اكب وسط السـوق وامشـي مـع السـاس//وآخــذ قـلـيـل الـحــق واتـــرك كـثـيـره

يـا رجعـتـه مــن قـبـل غــوّال الانـفـاس//و(ا)مـفــارَق الـدنـيــا يـجـيـنـا بـشـيــره

عـسـى يـطـق الـبـاب والـنـاس غِـطّـاس//يـاوالــي الـقــدره عـلـيــك (ا) تْـعَـبـيـره

وصــلاة ربــي عـــدّ مـاهــب نـسـنـاس//علـى النـبـي عــدة (ا)حـقـوق المطـيـره
والقصيده اطول من كذا لكنها لم تحضرني
.....................................
.....................................
الوكاد ان دباس يوم قراها جاه الهم والغم وعزّم على الرحيل...وارسل الرد مع المرسول

....وجلس بعدهم فتره وبعدين لحقهم..

المهم ان الرياجيل جابوا الرساله لين سلموها ابو دباس وراح يبكي يوم علموه انه حيّ وانه بيجي

فوصاهم العود انهم يكتمون الخبر وان نشدهم احد يقولونله مالقيناله خبر ...

(وكان الشايب يقرا ويكتب) ..ويوم قرا الرساله وان فيها مافيها


ورد الابن على والده ..؟






حيّ الجواب اللي لفانـي مـن الـراس//جــابــه غــــلام ٍ مـاتـوانــا مـسـيــره

اهـلا هـلا بـه عـد مـا كْتِـبّ قرطـاس//او مـا انكتـب بـه مـن بيـوتٍ شطـيـره

جواب من هـو لـي مـودّ ٍ مـن النـاس//ابــوي مـايـوصـف حـلــيّ الـغـريـره

فرز الوغى كنه علـى الوكْـر قرنـاس//(ا)قـــروم ربـعــه كـلـهـا تسـتـشـيـره

دلـيـل عـيـراتٍ الــى هـــب نـسـنـاس//هيـفـيـةٍ وسـمــا ومـــا بـــه ذخــيــره

مهفّي الغنم لهـل الركايـب والافـراس//ان جـو مــن الهيـفـا عليـهـم قصـيـره

راعـي معاميـل ٍ بـهـا العـبـد جــلاّس//لَ الـبـنّ يـشـرى بالسـنـيـن العـسـيـره

هــذي (ا)مركّيـهـا وهــذي بمحـمـاس//وهــذي صِبَـبـهـا للـوجـيـه السـفـيـره

واخـلا فـذا ياراكـب ٍ فـوق عـرمـاس//مامـونـةٍ مــن نـقـوة الـهـجـن عـيــره

حمرا وهي فـي سنّهـا وَقْـم الاسـداس//وابْـدن مهـي فاطـر ولاهـي صغـيـره

ولا هي لحوح ٍ راكبه بالعصـا جـاس//حِــرِّم عليـهـا غـيـر شـيــل النـجـيـره

والخِرج هـو و(ا)بيوتجيـل ٍ بقرطـاس//مــع مـزهـب الايــام مـاهــي كـثـيـره

فوقـه غـلام ٍ مِنوتـه قـطـع الارمــاس//لـــو هـــلّ لـيــل ٍ مـاتـغـيّـر نـظـيــره

وليا لفيت الدار فَ اجهـر بالاحسـاس//وبـلّـغ سـلامـي كــل ذيــك العـشـيـره

واختص ابوي اللي جفل لاجله الناس//وخـصـه بعـلـم وقــل تـرانـي بشـيـره

وان سايـلـك عـنـي تـرانـي بنـومـاس//وانــا احـمـد الـلـي ماتوسـلـت غـيـره

(ا)مطرّق افرنجي مضاريبـه الـراس//و(ا)مصَلْبَـخ ٍ جبتـه عسـانـي ذخـيـره

علـى فشـق لا قابـل الجـمـع ينـحـاس//ليمـا العشيـر يعـاف عـشـرة عشـيـره

صنّاعها نصرانيْ (ن) يشرب الكـاس//يِذكـر ورى (جــاوا) بعـيـدن مسـيـره

ابغـاه لـلـي يحتـدونـك عـلـى الـسـاس//واهـــل النـمـايـم والحـكـايـا الكـثـيـره

ربـع ٍ نـووا فيـك الــردا والتخـسّـاس// مهبـول يالـلـي قـلـت غـايـب عشـيـره

يابـوي انـا مارحـت ابـي كيفةالـراس//مــع ذا ولانــي فــي سـفــاهٍ وغـيــره

إمّـا سكنّـا الـدار مـن غـيـر هـوجـاس//والا نـعـاف الــدار ونـشـوف غـيــره

وكلّـه لعيـنـا كلـمـة ٍ قـلـت يَ ادبــاس//تشكـي وانـا دونــي بـحـور ٍ غـزيـره

والا فَ انـا يابـوي قـطّـاع الارمــاس//وامشي على الفرجه ولو هي عسيره

يامسنـدي يابـوي شـوف الــذي نــاس//ثم انشـده قـل ويـش اهـو فـي مسيـره

ان كــان مايـفـرح صديـقـك بنـومـاس//تـحـرم عليـنـا الـلـي نـهـوده صغـيـره

مدلـول مجمـول ٍ زهـا زيـن الالبـاس//وهـي بنـت مـن يثنـي الـى جـا كبيـره

طاري يقول اظهر وطـاري بمجـلاس//قمـت اشـرب التنـبـاك واثــره نكـيـره

ابغـى عسـى لـي يبـرد القلـب يانـاس//مــن لاهــبٍ حــرّق بقـلـبـي سـعـيـره

ومن كان له غايـب فـلا يقطـع اليـاس//ان قـــدّر الله جـــاب عـلـمـه بـشـيـره

في ساعة اللي قلـت والنـاس غِطّـاس//يـاوالــي الـدنـيـا عـلـيـك (ا)تـعـبـيـره

وجدي عليكـم وجـد مـن باللقـا جـاس//خِـلّـي طـريـح ٍ فــوق وجــه الغبـيـره

او وجـد مـن شـوّح بـدار ٍ ولا جـاس//(بابورهـم) بـان الخـلـل فــي مسـيـره

ارْخَصْ بـذبّ المـال وهـوه بالاكيـاس//ويصـيـح ل(الـربّـان) مـامـن جـزيـره

..
خالص التقدير والاحترام