ماتحرك شعوري هواجيس الانذال=اللي يحسبون المراجل خواطر
هو يحسب اني يوم انا اشوف ماقال=ساكت عنه ماني على الرد قادر
ما يدري اني للصعيبات حلال=واني بسوق الطيب والعز تاجر
ولا تهزني هرجة ضعيف ومحتال=ولاني لغلطات القريب مناظر
ولاصار مالي عند الانذال منزال=مالي ومال محفرين المقابر
خذ الخبر لادام عمرك ولاطال=وجنب طريقي دام انا معك صابر
لا ينفتح يمك طريقٍ ومدخال=وافهمك في درس ماضي وحاضر
لا انت بولد عمٍ ولا انت بولد خال=لكن رفيقٍ من يخاويك خاسر
وبعض الرفاقه قربها ربح واموال=بعض الرفاقه يمها لا تسافر
ولاكل من هو لابسٍ ثوب وعقال=رجلٍ يكون بحزت الضيق ظاهر
الطيب قول وتثبت القول الافعال=ماهو بزين اللبس والا المظاهر
هاك الخبر كان انت تفهم ورجال=وشوري تبعد عن طريق المخاطر

اقتباس من مشاركة سعد الشقل (المشاركة 35284) صح اللسانك اخووي علىى هالقصيده الرائعه وبيض الله وجهك ولاكل من هو لابسٍ ثوب وعقـال رجلٍ يكون بحزت الضيـق ظاهـر الطيب قول وتثبت القـول الافعـال ماهو بزين اللبـس والا المظاهـر

اقتباس من مشاركة منصوربن هديبان (المشاركة 35293) الله يعافـــــــــــــــــيك يــافيصــــــــل اشهـــد انها قصــــــــيده معــنئ وتصــــــــــوير صح الله السانك وعلي شانك تحياتي