ارجوك بعض المشاعر لاتهزهزها = ترى المشاعر تألم عند راعيها
وترى النفوس العزاز الها حواجزها = وحواجز النفس ستر (ن ) من خوافيها
لا تقول لك كلمة (ن) تحسبك تحرزها = وتطيح لاقمت منها منت قاويها
وان قلت لك كلمة (ن) حاول تركزها = ولا ترى الصمت خير (ن) من حكاويها
ودعواك لاصار ما تقدر تنجزها = ازبن على واحد (ن) ساعه وينهيها
ولا تجود على صبر (ن)يعجزها = وتجيك في وسط بيتك ما تناديها
وكم واحد(ن) حاجتها بالصدر يكنزها = من قل من يستمعله يوم يبديها
يخشى من اللي يهمزها يلمزها = يضحك بعض ناس لاكن ناس يبكيها
وشكواك لابن الردي حذر(ن) تعنزها = يفضحك وتروح فيها وانت كاميها
وعليك تكبر ولا تقدر تميزها = وتضيع في طوشة(ن) تبلش بتاليها
والسالفه يقدر الواحد يلفزها = ويقدر على ناس من شكله يمشيها
ولاتشغلك حرمة(ن) منت متجوزها = تطرد وراها وغيرك يهتني فيها
ولا يفرحك شوف الارنب لو تنقزها = مادام ما شفتها بالنار شاويها
ولاتحسب (ن) الذهب باي يد(ن) يزها = ترى الذهب ما يغير لون اياديها
والنفس حاول بحد اقصى تعززها = نفس(ن) بلا عزها ماني مداريها
والناس لاتقوم بعيونك تخززها = احمد على العافيه واسلك مماشيها
ومن طاوع النفس تشقيه بغرايزها = ومن طاوع العقل يسلم من بلاويها
والمرجله ماتحب اللي يهاوزها = تبي لها واحد(ن) دايم يحاضيها
واللي عيونه مع الظلما يغمزها = ماحد(ن) درى عن عيونه لو يعنيها
ونفيستك وانت فاني لاتغزغزها = المقبره بأنتظارك وانت ناسيها
والناس دورات قادرها بعاجزها = ماخلق جنه ونار وزعوا فيها
وناس(ن) مع الله وناس ابليس ناغزها = سبحان من ظل ناس وناس هاديها
وناس(ن) تعلت وعلتها مراكزها = وناس(ن) تبي الطيب مير الطيب فاحيها
وناس(ن) تحفز ومعروف(ن) تحفزها = وناس(ن) تبي من يشيمها ويعطيها
وناس(ن) تلعوز وتسلم من تلعوزها = وناس(ن) مع اللعوزه تبطي لياليها
وناس(ن) تبي نبز ناس وناس تنبزها = نابز ومنبوز لين الموت يفنيها
وناس(ن)عجز رزقها يكمل عوايزها = لاهي فقارا وهي مالله مغنيها
حتى العجايز تبي ناس(ن) تهمزها = العافيه والظنا ماهو مكفيها
وان قمت اعاند تفاكيري وابارزها = صارت حجاوي وانا ماني محجيها