يامكثرين الهرج ماسمع ولاجيب=تريحوا من فضلكم وسمحولي
تريحوا لا تلاحقون المشاهيب=على الردى ماني شفوق ٍ عجولي
بالعقل والصبر أدب النفس تأديب=وإلالها مده تصول وتجولي
خلج ٍ ترازم في سياج المحاديب=مافيهن اللي بالعقال معقولي
أشد وطيت زور من شمخ النيب=لاضاع مفعول الحيل والحلولي
أنا لاقلت أرتب القول ترتيب=حتى يجي كين على فك قولي
لارسلت لفكار القريحه مناديب=ترايعن من عقب ماهن جفولي
لكن مالي من وراها مكاسيب=لوكان عشاق القشرصفقولي
مايستفيد إلا العدو وألأجانيب=ولاني مطيع مقرقعين الطبولي
خليتها تعطي إفجوجن مجاديب=جرباً تجود في رسنها مهبولي
والله لاجنب دام لي درب تجنيب=من شرهت أحشام الرفاقه خجولي
لو أنها بين النحر والتلابيب= من الحياء وجهي مهو بمغسولي
طبعن لنا نشب عليه ونشيب= وطبيعة ٍ لاعلها ماتزولي
على الجماعه للجماعه مواجيب=اليا جهلواقدر الرفيق الهتولي
ماني على ربعي قريب محاضيب=ادنات مايخليني أسرج خيولي
أن جات من طيب شقاها على الطيب=لو أنها أعوج من رقبة الذلولي
وأن جات من مسكين منطق وأساليب=حطيتها بين الثراء والنعولي
لاحركة شعره ولاطلعت شيب=ولاضيقة خلقي ولاطق جولي
صبرك على ربعك علاج وتطابيب=يقصرحبال السالفه لاتطولي
حتى مايلقى في طرفها مقاضيب=كراه خير وللمشاكل ميولي
وليا بليت بتايهن شره وصعيب=يقول أنا العراف وأنت الجهولي
قل الله الله ياحصان ألأطاليب=يالفاهم العالم عطيب الفعولي
هذا الكلام اللي مافي صحته ريب=لاني بلا حولك ولاأنته بحولي
حصان وابن حصان طيب مجاذيب=وبالمعرفه رجل ٍِ محلي ودولي
خله يروح يخطي الدرب ويصيب=ويقول مابالناس عرضي وطولي
والفرق ماهو باللحاء وألأشانيب= الفرق بين الناس فرق العقولي
كم واحد ٍ تحسن به الظن ويخيب=السن يضحك والفؤادمغلولي
واللي غدت به كلمتن مالها غيب=ماهو من اطيب ربعي اللي غدولي
يالله عساها صيحتن في قفاء ذيب=وقلع النيا بيني وبينه يحولي
الرجل مايغصب على الطيب تغصيب= لاصارماهودل ظمن الدلولي
ومن عادت اللي طيبه يحضر ويغيب=لاطالت الرفقه زهوقن ملولي
وليا بلنك غبرألأيام بصحيب=في مستوى طيبه صعود ونزولي
أعرف ترى الدنيا دروس وتجاريب=والكامل الله والنقى لرسولي

اقتباس من مشاركة سعد الرشيدي تسلم يمينك اخوي مرضي على نقل القصيده الرئعه وصح اللسان الشاعر اخوك سعد

اقتباس من مشاركة الرشيدي صح لسان الشاعر//لافي الغيداني وسلمت يمينك على هذا النقل الرائع