يابنت يكفي دخيلك لاتبوسيني=خلاص يكفي ترى مليت مشكورة
وش لك بخدي يابنت الناس فكيني=عندي طريقة وهي ماهيب محظورة
نامي على صدر ابوك وحيل ضميني=لو تصبح عظام صدري منك مكسورة
انتي أساساً مكانك في شراييني=مشاركة بالمحبة والغلا "نورة"
ولاهي غريبة على مثلك تحبيني=لاني أحبك وانادي دوم عصفورة
يابلسم جروح ابوك وفرحة سنيني=يامن لها بالضلوع وخافقي صورة
أهديت غيرك كلام رويشد "اعفيني"=وانتي لك بذمتي "درة وبلورة"
اموت في ضحكتك وانتي ذبحتيني=بلشة عنيدة وكتكوتة وشطورة
أن جيت اريّح وانام الليل توذيني=متسلطنة تضرب الجدران بالكورة
تلعب على عيني الكورة توريني=والله ولا سامي الجابر وجمهورة
واليا بكت تنقلب عندي موازيني=دنياي من دمعها وأن سال مذعورة
كن الزلازل بصدري والبراكيني=قامت تفجر وكن الروح مخطورة
واليا ضحكت قلت أنا بالسوق بيعيني=لو كان سعري ثلاث ريال معذورة
والله ما أحسد على ضحكك سلاطيني=اموالهم في بنوك جنيف محشورة
انتي حياتي وعمري شمعة سنيني=ودي اشوفك إليا شيّبت دكتورة .
ادواي لاجيت لك تعباااان ضميني=الوصفة اللي ترد الروح "عبورة"