اليا متى يامعيبد الجيب تشريه=طالت وحنا لامتى محترينه
لقنوص صيد ولانبى نتفل فيه=نبى عليه انروح يم المدينه
لزومنا واجب ولابد نقضيه=صلة رحم فيها عهودن متينه
يكتبلنا الله حسنتأ في تخطيه=والله على مشوارنا نستعينه
الياكتمل تشييكه وقالو اوكيه=للازم الي كلنا مهتوينه
من شيشة بطيحان ناقف نعبيه=وسيده مع السيدين عن خط لينه
ومن مفرق البترا نزيده ونعطيه=بشرط ماتطفي بلوف المكينه
كله وفا للشايب الي نحاتيه= الله على تالي حياته يعينه
رجال دين وفرض ربه مصليه=مشهودله في حسن طبعه ودينه
حافض كتاب الله وفاهم معانيه=افضل جليسن جالسه في سنينه
ماسب جار ولاشكا الي حواليه=كل الجماعه بالوفا خابرينه
لاوصله المحتاج يملا مخابيه=يمشي منه مسرور باله وعينه
والضيف لامنه لفاله يحييه=ذبيحته لاجاه ضيفه سمينه
الله على فعله يثيبه ويجزيه=ويضفي عليه من السعاده سكينه

يعبيد كم واحد على الجيب اوصيه=ماشفت للمطنوخ يالسوق عينه
واليالقيت الجيب واقنعت راعيه=وسلمت قيمة مبلغه في يمينه
اعلمك واعطيك كامل مواريه=وقول بمرك للطلب راهنينه
امنبن ماودك توجه نوديه=نسوق قطاع الخرايم بحينه
ولازمك قبل الجيب ياعبيد البيه=ماهو لزوم الجيب ياعاشقينه
دام الطريق ازفلت وش حاجتك فيه=والكابرس موجود ومجهزينه
الكابرس في مركبه مايحاليه= الا على الامواج هوس السفينه
راسين ماطوره وساعن مجاريه=ماهو منلي يزعجك في حنينه
يريحك ممشاه والبعد يطويه=انشد عنه راعيه ومجربينه
نروح للشايب كبير المشاريه=الي جميله ماوفينا بدينه
مهما نسويله من الصعب نوفيه=والا مقامه بالصدر حافضينه
حقه علينا يابو صالح انواسيه=ياكبر اجر من بر في والدينه
من المرض لعل ربي يعافيه=ومع كبر سنه يرحمه مايهينه
طلق الحجاج الي كثيره حسانيه=راع اليمين الوافيه والامينه
له سيرتأ لاجابو الناس طاريه=منزحه عن كل نقص وحصينه
للضيف والجيران والي يخاويه=والي يجيه بحاجته يستعينه
مافيهم الي يابو صالح ردا فيه=ميزه فبوي وكلنا عارفينه
عساه يوم العرض بضلال واليه=ربأ بواسع رحمته مرتجينه