الرواسي راسيه لو هبت الريح بهواها = والله ان طويق باقي في ثرا نجد العذيه
ياقصيدي وانت مثل القمره اللي في سماها = نورت ركن الفضا لو الليالي سرمديه
يوم جفن الموارد وامحلن من عذب ماها = والله انك ماوردت الا على عدن رويه
ادري انك عارف القصه وانا ببحث خفاها = ماينزل قدرك العالي (مزاد الأبجديه)
الذيابه لو تروس الرجم وتكرر عواها = ماتهيب من يشممها بخور البندقيه
البلا صكات بقعا يوم دارت في رحاها = مايرد اسهومها من كانت عزومه قويه
الشهاده زور دايم في جهنم منتهاها = لو يجون اشهود (خمسه) زور نيتهم دنيه
علمو من جابها من حر ماله واشتراها = لايسيبها تراها غاليه بنت العبيه
يوم قالو ذمة العشاق هابط مستواها= من يلوم ابن الملوح دام حب (العامريه)
والصحيح يصح والدنيا فلا يلحق مداها = شرعنا شرع الولي نبقا على سنة نبيه
والرواسي راسيه لو هبت الريح بهواها = ابك ذاك (طويق راسي) في ثرا نجد العذيه