اشوم نفسي وتعدى عن اللوم=وارقى لها روس الجبال الطويله
واصحى لها عن طيشها وغفوة النوم=أخاف من بعض الكلام وحصيله
ليه عادات ولي تقاليد وسلوم=رجال والله وانتمي من قبيله
وربعي هل النخوه اذا جيت محروم=ميقافهم سم الكبود العليله
رجال واحد مننا يهزم القوم=لصاح كل ارقابهم تنثنيله
وان كان فزينا سوا الموت مقسوم=ناصل هدفنا وناصل المستحيله
الكل منا عنده الخوف معدوم=قدرة من الله حطها بها القبيله
ياحظ من جانا معذب ومضيوم=يلقى الوجيه الطيبه تعتزيله
ودخيلنا يبقى مكرم ومحشوم=أي دخيل أن كان والا دخيله
لامن دخل يسلم ولا نقبل السوم=أصلاً ولا نرضى عليه الرذيله
لو تقلب الدنيا لنا رمح مسموم=عشانه نحط العذاب ونشيله
الله خلقنا ناس في هيئة سهوم=الحمد لله والشكر والفضيله
وعزوم فينا ياهي عزوم وعزوم=ويشدنا الخيل الاصيل بصهيله
وفينا الكرم خلقه وعداتنا دوم=النار حيه والليالي بخيله
وللضيف قدر واجبه حق ملزوم=يقسى الزمان ولانمد القليله
من خلقة الدنيا والى يومنا اليوم=ماغيرت فينا العصور الثقيله
نبقى ويبقى فعالنا بالسماء نجوم=للجيل هذا ويرثه جيل جيله
لاجل الحقود يموت حره ومكتوم=ولا جل العقول الغافله والهبيله
لا مانعرف ماعندنا حبة خشوم=يموت هم ولا يتشفى غليله
وتبي الحقيقه اصبح الامر محسوم=في مدح ربعي ماتكفي وسيله
وماهو قصورً بالقبايل وعموم=ماذم كساب الشرف والجميله
ويكفيني اني بس رشيدي وياقوم=دامي رشيدي أصل اللي ابيله