يالله يالمعبود ياقاضي النوب = يافارج الشده كريم الوهايب
ياللي كشفت الضر عن عبدك ايوب=وبامرك وتقديرك تهب الهبايب
ياعاقل يوسف على ابوه يعقوب = ويونس دعاه وفك عنه المصايب
يافارج الضيقات عن كل مكروب =وانجى خليله من سموم اللهايب
ابطلبك يالله ياخير مطلوب=ياغافر الزلات عن كل تايب
هل رمضان وطالب العفو والتوب =ومن يلتجي بالله ماهوب خايب
عبدن ضعيفن يشتكي هم وذنوب =ذنبه كثير وكثر حب الترايب
وعسى صيامي يالولي دوم مرغوب = وبالاخره نجزى بحسن الثوايب
وتلطف بنا في يوم حاصل ومكتوب = يوم الحساب ويوم كشف الكرايب
والخاتمه صلوا على خير محبوب = على النبي اعداد وبل السحايب