عزالله اني ناوي البعد يازين= لو كان قلبك يملك الشوق كله
مافيه لحظه لا تقولين بعدين= القلب عزم وأدري دربه يدله
حل الفراق ودمعة العين للحين= باقي أجلها بالرموش المظله
أبكيك ليه وحضرتك من تكونين= حرام دمعي لجل شخصك أهله
روحي عسا من بعدها ماتردين= خلاص روحي لا ترددين لله
غالي وأحصل بالبريين غالين= ناس تعرف الحب دقه وجله
واللي شراني طيب بهديه شيين= قلبي وعيني كلهم فدوته له
ومن باعني برخيص عند البريين= نذرن على أسقيه كاس المذله
واللى يسومه لو على الحول بالدين= والله لا أبيعه لو حصل ماحصله
واذا رجعت لحبك اللي من سنين= قولي كلامك ماحصل في محله
ولاأنت بقد الوعد والعهد ياشين= ولا أنت اللي بالمواقف زحله
وذا صدق وعدي وصرنا بعيدين= وقلبك من الفرقا همومه تشله
وصاحت بك الذكرا لذيك العناوين= والشوق هزك وأسكن القلب عله
لا تطلبين الوصل لا لا ترجين= قلبي ولا تقولين ليت ولعله
يرجع كما كنا حبايب قريبين= نمشي بدرب الحب لاما نمله
لا لا وربي ناذر اليوم نذرين= نسيان حبك وأيضا شخصك أذله
هنتي على اليوم دامك تخونين= وللساع قلبي مابرد فيه غله
والله مايرتاح قلبي ولا العين= الا تشوف الدمع عينك تهله
وأراهنك وأعطيك اقوا البراهين= ان لأخلي الهم داره وحله
في وسط قلبك بين ذيك البساتين= وافضحك وأنشر قصتك فالمجله
وأكتب عباره عندها بين قوسين= هذا جزا من خان فالحب خله
حيث ان حبك مات موتت شقيين= في وسط قلبي مات موتت مذله
وأنا أعتبر ماصار زله كريمين= زله وعدت لكن أخير زله