لاهبهب .. السافي وحر اللواهيب = ماينفع.. الماشي كثير الخطاوي
ولا هاضت .. غلاظ الجروح المعاطيب = دوّر .. على طب الطبيب المداوي
دوّر.. ذراك اليا أدركّتك المشاهيب = مالك .. ومال مقربين الحراوي
ما تتعب .. الرمضا ملاس العراقيب = الا لمن .. ربعه سوات الحداوي
ولا تجفل .. الناقة بشوف المشاعيب = الا ليا .. كب المراح الشواوي
والشعر .. وأن جمّل وجيه الرعابيب = ماحط .. قدر المعتلي و النداوي
للشعر لذة .. لا أتجه للغواليب = أهل الظفر .. ومرددين العزاوي
عبسان .. لا ماتت فعول الأشانيب = تطنّخ .. وتجلي كايدات البلاوي
أهل .. الصخا ومكثرين المواجيب = سمح .. الوجيه مزبنين الجلاوي
قوماً .. ليّا قامت تفك المناشيب = لامن .. تساوى حلمها بالمناوي
ياعبس .. شفنا معسرات التعاجيب = يوم.. أختلط كبر الخطأ بالدعاوي
بكر الرشيدي .. طوّعته المناكيب = و أقفت مغاتيره .. و صار الشقاوي
ضاقت عليه.. و غربلته المصاعيب = و أضحى .. يبدد ضيقته بالرجاوي
همه .. تناهى بالظلوع المحاديب = والحزنِ .. قاسم ضيقته بالتساوي
جاكم يدوّر .. ضيفته يالمعازيب = ما دوّر .. الضحكه وكثر الحكاوي
أما تلبّون .. الفدا و المطاليب = و يبّدل .. الظلمه بشمس الضحاوي
والا تلقو .. شرهته يالأصاحيب = لامنها .. ضاعت جميع الهقاوي