ياأهل الفعول الجديدة والقديماتي=تبقون للمجد والنوماس ماريّه
وتستاهلون أحترامي مع تحياتي=لاكن قصيدي أله عندي خصوصيّه
أنا فرايد معاني ندّر أبياتي=ابكار وضحٍ من الأفكار منقيه
تزها براعي الجمايل والمرواتي=اللي صروحه على الأمجاد مبنيه
تعانق طويق وجبال السرواتي=تاريخ عزٍ مواقيفه حقيقيّه
ماهو كلام الجرايد والمجلاتي=ولا هو بصنع المحطات الفضائيّه
مشعل حفيد الرجال أهل البطولاتي=اللي تضد المعادي ساعة الهيّه
لاصاح صياح ركاب الأصيلاتي=ثم لوحوا في سروج الخيل عصريّه
ماينكف اللي غزاهم بالثميناتي=يجون خياله ويقفون رجليّه
فعل ٍيسطر على بيض السجلاتي=ولا أحدٍ بغاويته فعول العطاويه
متوارثين الفخر من روس الأمواتي=والحي منهم عساه يدوم مع حيّه
من طيب راسه يضيعن العباراتي=ويشيب طرقي ولاشابت قوافيّه
أبومحمد وهذا الأسم بالذاتي=مدحٍ ماهو فيه ياأهل الشعر مرثيه
ياكثر من يعتزيبه فالملماتي=تقول قصره قصر وزير ماليّه
تنصاه صعب الأمور المستحيلاتي=عليه بعد الله الحاجات مقضيّه
عنده كبار النشايب والمصيباتي=مشروبةٍ كنها فنجال بريّه
مايتعبه للوفا طول المسافاتي=المرجله وسط دمه نارها حيّه
يصبح غني مثل تجار العقاراتي=ويمسي يدينه من الدنيا خلاويّه
عنده خلل في نظام الدافع الذاتي=يعطي ومدات كفه لاشعوريّه
له مدةٍ تطغي أصحاب المعاناتي=اللي سنواتها بالفقر مطويّه
ماحدٍ ينافسك في جزل العطياتي=أخذت الأول على الروس الكباريّه
رصيدك الجود ويدينك حساباتي=تهتز من جودها بنوكٍ تجاريّه
أكرم من السيل لأرضٍ نبتها ماتي=يحيي ثراها عقب ماهي سناويّه
وأنا ماتربطني بمشعل علاقاتي=وأذا أجمعتنا علاقه فالشرف ليّه
والله مانيب طلاب العطياتي=والنفس باللي رزقها الله غناويّه
لاكن وفي والوفا قصدي وغاياتي=والطيب بين العرب تحمد مسياعيّه
أبومحمد وهذا الأسم بالذاتي=مدحٍ ماهو فيه ياأهل الشعر مرثيّه