يامنتهى صبر السجين اللي قريب من الأمال = ياعصف ذهن الفيلسوف اللي على وقته وطا
اقرب تعال أبيك بالموضوع فصله واتصال = أنا غزيت الفرس وأهل الفرس للروم أخلطا
ماهز شعره من شعر راسي ثراثير الخبال = ولا أعاتب أصحاب الوجيه اللي مع الوقت أبلطا
أبوي ماخلا علي قصور من عرف الرجال = مسكني الدرب الصحيح وقال رجلك والخطا
أقرب من دروب المراجل قرب كبدك للطحال = وابعد عن الزلات بعد الشمس عن سطح الوطا
أحرص على ذخر الرجال اللي يشيلون الثقال = والا الردي خله يروّح مع مراويح القطا
ترى صدور أهل المعرفه دونها حرز القفال = لو أن من سطو الزمن بوجيهــهم وسم ٍ سطا
ياعابدين النمنمه بقفي طلقين السبال = كف ٍ صفقتوبه وكف آخر يـــدورّ للعطا
وضح القوافل سايره والنبح ماهم الجمال = والهرج مايرفع بن آدم كان في فعله وطا
مايقدح عروض الرجال الا الزنيم بن الريال = اللي لقح بالرافدين ونجد له صارت غطا
اليا زهمته من عيال الحنث قالو لي حلال = أول مطيه لكن ان الوقت شاله وامتطا
هقواه سرج المهره اللي شالت زحول العيال = ياما استوو في سرجها ربع ٍ على الشر أقلطا
من ماحسب بعد النظر يحسب من حساب البغال = والشعر لو ينطاه نطوه نطو رفلا لانطا
يامن تدورها على راسك تبي تركب عقال = أصبر عليها واصله لاتشتكي هم البطا
يبي يدور بك الزمن دور الرشا فوق المحال = لاهب لك ريح الشمال وطحت بيدين نشطا
ياعبس ياروس الجبال الشامخات من الجبال = العز رفرف والشعاب الساقطه تبقى سقطا
عين الحسد لو طالعت في مجدنا دونه خلال = سهلين بايام الرخا ومع العبيطين أعبطا
اللي يمثلنا يشرفنا ويرقا للمعال = يحسب خطاوي سكته في كل خطوه لاخطا
لكن على ماقالوا العقال سيري ياجمال = القافله تمشي ونبح أكلابها حقد أغبطا