قبيلة بني رشيد

هذه القصيده لشاعر عبدالله بن باتل:

ماكل تعبيريشادي للتعبير = ولسان غيري يختلف عن لساني
جربت والدنيا تجارب وتقزير = وبالعلقمه حصلت سـحر البياني
ومالي عن اللي يكتب لو اطير = وعـز الله اني خايف من زماني
واللي مضى كله براسي عيا يطير = واليوم اقول الله بس يحماني
دنيا عجيبه شرهاا اكثر من الخير = فعلا خلقه الله دار امتحاني
قسمه وضرب وطرح واعداد تكسير = مايجيب لك تعريفها غير اغاني
قبل العنا تبلش بما بوسطها يصير = مثل كواكبها تدور دوراني
كل يبي منها معـزه وتقدير = وكل يبي منها معاش ومكاني
ملعب وفيه مدرجات وجمهور = تاعب فيه الاغبيه والذهاني
رفعا وخفظا واستعانه وتسخير = وكلن حسب ترتيبه اول وثاني
المال والسلطه وحب الغنادير = على الثلاث بقول كلن عساني
دربين فيها بس لاثالث غير = والله يعين اللي يخلط اخلطاني
دنيا وفيها حمار يفرق عن بعير = وفيها الكديش كديش لو هو احصاني
وفيها الرجال اثنين عمار وعمير = مثل رصاص الملح والطرطعاني
ولاخير باللي مايتأثر ولايثير = ولاخير باللي مايعرف المعاني
ومن لايقدر مايقابل بتقدير = ومن فيه عـزه نفس مايستهاني
والطيب اللي مايهاب المخاسير = والا الهداني لو ضحك لك هداني
ومن له جناح اكيد لابد مايطير = وان حاشه المكتوب طــاح بثواني
وعن المقدر ماينجيك تحذير = ان سرت والاطرت يالمودماني
وماتخوف العقيل غير المقادير = ولاينضعف ويخور غير الجباني
ولاتنفع الخطاي بعض المعاذير = ولايعيفك بالناس غير الاناني
وبعد العـسر لابد مافيه تيسير = ولافيه بعد القسوه الاالحناني
وبيت الشرف يصمد بوجه المعاصير = وبيت الردي ينهار وسـط المباني