يامن يليّن لي مصاليب الاحداق=ويرد لي نوم العيون الهنيّه
إشتقت للراحه بعد وقت الارهاق=لو هي دقايق قبل وقت المنيّه
ملهوف عطشانٍ على الموت منساق=مجروح من شهب السنين العصيّه
في ضيقةِ مترسبه وسط الاعماق=اسنين مثل الجمره السرمديّه
لاطاف نصف الليل تحرقني إحراق=وفي كل عرق إيكون منها شظيّه
منها الصدر نوب ايتفتق تفتاق=وتشلع محاديب الضلوع القويّه
منها بلعت الحزن مع مر الارياق=ومنها نسيت اني بوسط البريّه
داويتها من كل راقي بترياق=ودواي صار إلكل موجع مطيّه
ولا ادري متى يروح ليلي بالاشراق=ولا ادري متى انسى كل جرح وخطيّه
ياكثر ماماتن حروفي بالاوراق=لا صار فيهن للفرح نصف نيّه
طالت وطالت لين ماخاطري ضاق=وكف الهنا ماشفت منه العطيّه
واليوم من درب الحزن ملت الساق=ولا عاد لي في جرها مقدريّه
ابنتظر نومة مصاليب الاحداق=لعلها اتعود الليال الهنيّه