قبيلة بني رشيد - خله يطيح الحظ والرآس مرفوع ..

البارحة قايـم مـن النـوم مفجـوع
حلمت و إنّـي فـرمضـان أتغـدّى

يا كثر ما جاني من أحـلام هالنـوع
لمفسّـر الأحـلام مــا تنـتـودّى

نومي على كوعي و حظّي على الكوع
أقالبـه مثـل المريـض المـسـدّى

خلّه يطيح الحـظّ والـرأس مرفـوع
رأسي على الرفعـة تـراه المبـدّى

أنهض ولو مكسور لي خمسة ضلوع
و أسمع و أعدّي شيّ مـا ينتعَـدّى

بيني وبين النّاس الإرسـال مقطـوع
الظاهـر إن السلـك نـدّى وصـدّى

ليا رفعت الصوت ماهـوب مسمـوع
وليـا كتبـت رسالتـي مـا تـودّى

والوقت ما يهدي لنـا ورد وشمـوع
يهدي مـا تهديـه الخصـوم الألـدّا

يهدي لنا ونّـات وآهـات و دمـوع
و يصـدّنـا ويحـدّنـا ويتـحـدّى

الهمّ صار يمرّنـا طـول الأسبـوع
و الضّحـك صـار يمرّنـا ويتعـدّى

وحنـا بـدو فينـا تقاليـد وطبـوع
علـى سلـوم الأوّلـيـن نتـقـدّى

فينا كرم موروث ما هوب مصنـوع
لكـنّ تجبرنـا الظـروف نـتـردّى

واللي يقول الشعب ميّت من الجـوع
ما هـوب منّـا يـا ملكنـا المفـدّى