يا هاجس الأشعار بالله قم فيق = ما دام لك بالشعر قدره وطاقه
ابيك تبهر بك جميع المخاليق = وتسوق حرف الشعر فن ولباقه
وثق لي الفكره من البال توثيق = وعطني معاها وردتينٍ بباقه
ولاصرت رايق قلت من دون تعليق = أوظّف الشعر المحنك سياقه
ولاصرت ضايق خلني حزة الضيق = لني ما عاد أعرف ربوع ورفاقه
احشم صديقٍ ما يكب المواثيق = وأسفه صديقٍ ما يحشم الصداقه
شاعر وأحلّق في سما الشعر تحليق = وأطلع بعض الاحيان خارج نطاقه
حتى لفتني طعنتةٍ بالمعاليق = من واحدٍ وثقّ عليّه وثاقه
قال الفراق وقلت والله ما طيق = أفراق من يصعب عليّه فراقه
واقفي وحرّق قلبي اليوم تحريق = ماظن باقي معه عطف وشفاقه
لو ينشكي همي على قمة اطويق = يصبح سهل ما فيه طلعه وعاقه
ويا وجد حالي وجد منّ نشف له ريق = وسط الخلا طايح ومكسور ساقه
وقامت تصافق وسط راسه صوافيق = غريب دار وجاء يدوّر أنياقه
هذا وجودي دون كذبن وتلفيق = وقلبي على المجمول زاد اشتياقه
وغنيت له طاروق غير الطواريق = طاروق صدره أيق والعجز آقه
وان كان صفّق كامل الزين تصفيق = موج البحر عندي يزيد اصطفاقه
لاكنَّ ابصبر واردف الحلم تحقيق = حلمٍ يرد اللي مضى والعلاقه