ياكثر ماشافت العين من طيب وردا =شي يرضي موقها وشي يزعل موقها
كم مطرنا زلتن مالنا فيهآ جدا=قبل نطمن مثلها نعتلي من فوقها
وكم وقفنا للخطا الفادح وقلنا بدا=من يقدمها لنا عنزروت يذوقها
وكم حشيم لحشمته قلنا للمخطي فدا=لاحشمنا روس قومن نحشم نوقها
والتغاضي بعض الامرار حكمه وازهدا=عن غشيم زلته كل يوم يسوقها
والصداقه عند الاجواد ماتذهب سدا=لو قطعت عنوقها ماقلعت عروقها
دايم الاصحاب حصن تلافح وتهدا=لو تشين نفوسها ماتخيب عموقها
الأصايل يلحقن كل ماطال المدا=ولاينقص قدرها عنتن بعنوقها
والتجارب علمتنا الخطأ قبل القدا=علمتنا كيف نعطي الرجال حقوقها
وعلمتنا سلم الاصحاب وسلوم العدا=وعلمتنا غاية الناس من منطوقها
النوايا الباطله حظ اهلها ماعدا=والنوايا الطيبه طيبات وفوقها

شاقني شاعر على منبر الجزله حدا=والقصائد من غزاره شدا طاروقها
وكل شاعر جزل يلقى لمنتوجه صدا=مع رجالٍ كل موقف عصيب يشوقها
لا تعدد وقتنا من يعدد لو عدا=شاب راسه والليالي تزيد فتوقها
كم عاقل زلزلته الليالي ما أحتدا=وشرهته لأهل الجهل ما يفك أسبوقها
وكم جاهل مع غثاء الوقت فالدنيا غدا=ما يميز في وجيه الظروف فروقها
راح ناس وجاك ناسٍ مع الوقت أجددا=وما خرج من طاح فيها وذاق علوقها
قالو إن الخير والشر ضدين أبعدا=ما تجي في وقت واحد تفك حلوقها
لكن الوقت أنقلب والطريق أمهدا=قامت الثنتين تاتي على طابوقها
الردي دربه سهل ما عليه مشددا=والوفي وجهه ندي ما يفك وثوقها
كم نهجنا بالوفاء والزمان مسرمدا=وضحكة الصبح الحياوي بعيد شروقها
وكم وقفنا وقفة الطيب والناس أشهدا=ماندور للعوض فالسنين وسوقها
لك تحياتي وقافي على شانك شدا=بأسمي ورسمي بيوتي تلوح بروقها