قال الوداع وقلت لحظة ثواني = إن كنت أنا غلطان قلّي وأراضيك
قلت وعيوني وضحت لك معاني = غلاك عندي واضح ٍ دون تشكيك
أصبح غيابك جرح منّه أعاني = أصبح هجوس الفكر مني يخاويك
جيش الحزن من غبت عني غزاني = هل من صحيح اللي يقولون ( ناسيك ) ؟
صحيح أنا مرّات طبعي أناني = أغار من ورد ٍسقيته بأياديك
ياما على دنياك شوقي خذاني = من صادق الإحساس عطني وأنا أعطيك
كلي وله كلي شعور وحناني = تأثير بُعدك واضح بحال مغليك
مازال في صدري تموج الأماني = ياليت من ثاني تجيني وأنا أجيك
شهور مرت في عددها ثماني = شهور وأصوات القوافي تناديك
فينا العواذل ينقلون التهاني = لاتشمّت العذّال فيني ولا فيك