قبيلة بني رشيد - قصيدة( أنا رفيقك والسند وقت اللهيد)

حبيت أن انقل لكم هذه القصيده

الله كريم ٍبالعطا ورب العبيد
والله عليم ٍكل ما يخفى ويهل

أطلبك ربي يا عظيم ٍيا مجيد
يا مكرم الإنسان والنشأه طفل

إنك توجهني علي الرأي السديد
وتساعد المخلوق لو همه ثقل

ودي عطور ٍمن قصيدي لطريد
وأطلع على متن الشعر قمة جبل

تري الأخو مثل الذهب قربه وطيد
وشوفته مثل القمر وقت المطل

أقولها وأفخر بها وأعلن وأزيد
من داخل الخاطر على قول وفعل

أنا رفيقك والسند وقت اللهيد
وأنا الكتوف اللي تشيلك ما تمل

وأنا سحابة يم والبرق الرعيد
وأنا الغطا وأنا العطا وطيب الأمل

وأنا العيون اللي تضمك والرصيد
وأنا الشموع اللي تضوي لك شعل

وأنا شبابك لا وصل عمر الجليد
يذوب عمره راجع إصغير وبتل

وأنا حزامك لامسك وسطك عنيد
ما يفلتك وقت السعى وقت الزعل

وأنا الفرح لا غاب يرجع من جديد
وأنا عصابة راس والتاج الجزل

وأنا الجبل لا طاح من دونك شديد
تبقى مواجع طيحته عبرى وتشل

وأنا السيوف اللي بيمينك ما تحيد
من غمدها عند اللقا تأمر تسل

وأنا قراحك لا نشف عندك وريد
إملا وريدك بالقراح وأسفهل

وأنا العدو للهم لو ضربه حديد
متحيزم إلِّه بالخناجر بالعجل

ثم ينطرد ثم يعتذر لك ما يعيد
ثم ندحره لو عاد جيشه بالبطل

وأنا قصيدك لو بغيت أحلى القصيد
وأنا الحروف اللي بلسانك والعسل

سعد بن جميل الرشيدي