|
![ للـَتاريخْ ، ثم لـ عَـادِل الذيـَابِيْ ]!
بسم الله الذي يرجع له الامر كله ! // إن الشعر يفعل بنا .. مالا تفعله سائر الكلمات فـ هو ملهاة عن الاحزان .. توطيد للأفراح والمسرات فـ الشعر رفيق لنا بهذه الحياة ذات الطوابع والكينونات المختلفه منذ قديم الزمن وغابر السنون ! هذا ويبقى الشاعر انساناً طالما بقي في شعره صادقاً آخذاً بناصية المروءه ماهراً في فن الصدق عبر حياته التي .. اوثقت بداخله صنوف العيش ونمو العقل والتشبع الفكري اللامحدود و الموهبه التي تنتج لنا شعراً فيه من الابداع مافيه ! // في هذا الموضوع .. سأجتر ذيول الكتابه .. لأصخرها لشاعر يسكنه جنون الكتابه يتكيء على ازدواجية الحرف وعابِث الكلم .. صوره الشعريه / التقاطات من حياتنا اليوميه . يعلم تماماً مافي صدورنا ليهبنا شعراً يتحدث عنا .. يسكن فينا .. يزخرفنا جمالاً ورقه فهو الشاعر القادر على تغيير مسار العبارات العاديه .. مبتعداً كثيراً عن التقليديه لينصاع تحت يديه لغه شعريه لايتقنها الا هو نفسه .. فيولد معه عذراء " القصيده "صفصف جسدها على يديه .. مستعيناً بالجمال فكراً وبالصبر اتقاناً .. وبنا غاوون فلنختصره كما وصف نفسه : صفقت بالشعر / لين اعجبت جمهوره آطآ على الجرح .. والجمهور يوميلي منغيره .. لديه كل تلك الانفاس الطويله .. والافكار المثقل كاهلها بالروح التي تضج كبرياءً وشموخاً المعروف لا يعرّف ولكن هو : الشاعر والمبدع والرائع [ شاعر أهل الغار ] : عادل بن علي الذيابي لـ نفتح له اقواس صدورنا .. لـ نتنفسه بلا زفير .. لـ نشد الاهتمام بـ نبضاته لـ نتعطر بانفاسه و لنتبلل بالحنين الى قبائل رجولته لم / ولن تمر قصائده العذبه كـ قطر الندى .. مرور الضباب دون أن تروي ضمأ الذائقه ! فلنعش قصائده : شعراً وسحراً .. وبياناً ينجلي بـ بزوغه عتمة الارواح // يمنع منعاً باتاً .. اقتباس هذه الماده ونسبها لـغير كاتبها .. ونسب القصائد لـ غير شاعرها // مع العلم بأنه سيتم حذف اي رد ومشاركه مع الاعتذار والتحيه كتابة وتحليل : رائد الذيابي |
لازهمتك ياهجوس الشعر ردي =للقصيد رجال .. واحساس.. ومبادي وان نخيتك ياذلول الحرف شدي=عزي الخطوة على طق الشدادي استريحي .. ياقوافي.. واستعدي=للقصايد عندنا…… علم وكادي هنا .. للشموخ للكبرياء لأي شيء / لأي شيء يُشار له البنان بالانفه والعزه ! شاعرك ياسابقي يهوى التحدي=مايزعزع نظرته كيد الاعادي تصعب الاوزان.. وآخذها تحدي=وتسري القيفان .. وآخذها عنادي - روح التحدي .. " تتمخطر " رغم انف الحروف ورغم انف الكَلِمْ - حتى وإن ثرثرت الطبقه التحتيه من الناس ! فـ الجبل صامد بوجه الريح .. وشاعرنا جبل - لاصعب بقاموس شاعرنا الا روّضه ولا عظيم الا استصغره مانضب صدر الورق من وبل مدي=ولارويت الحرف من راهي مدادي صرت ندك يابحر ؟والا انت ندي؟=امتدادك صرت ؟ والاانت امتدادي؟ - لم ولن تجف اودية الصفحات بـ هطول شعراً من سُحُب فكر وابداع عادل - إنصآت بالجزر والمد .. لي جزري ومدي!!=تصفق امواجي على شاطي فوادي ماوردت الا على حوضي وعدي=ولاثنيت العزم عن غاية مرادي ماتعدى شرهة الفنجال يدي=ولا رضيت اعيش مقصور الايادي عادتي مايستفز الهرج ردي=ولااعتزيت الا على صهوة جوادي والخوي اللي عن دروبي يصدي=والله ليقفي ولايسمع منادي كان راح اقول جعله مايردي=مارجيت اللي نكر ملحي وزادي لو يشح الوقت مابيحت سدي=اكتفي بالصمت واحسب لانتقادي وبعد ان تنفس شاعرنا .. وشق الطرق لـ فكره راح يبحث عن يقين لـ ينصب خيمته رؤيه مختلفه للواقع الـ يعيشه المترامين على سكة المنفى ! النازحين والمُشردين الـ يمتطون صهوة الارصفه لـ جعلها فراشاً وصدر السماء لحافا تبتدؤهم الاحلام معاً .. ليتقاسمون الاحاديث الغافله الـ تتسرب من اول مصير يتعرفها يابلادي .. والزمن لاقام ضدي=قمت انادي.. يابلادي.. يابلادي.!! ماسمعت الا صدى صوتي يردي=يامنادي لاتصيح.. ولاتنادي هنا [ اليأس الجميل ] فكيف أن يكون اليأس جميلا الا بعد مايمرره شارعنا بين أزقة شعره لـ يضهره لنا بصوره اخرى مختلفه عن .. مانلتمسه بيننا كان ودك.. بس انا ماكان ودي=كنت عادي.. بس انا ماكنت عادي جيت لكن.. مالقيت رجال قدي=صرت في هذا الوطن عنصر حيادي الانطواء على الروعه شيء يقيناً بأنه انفتاح في طريقي وين ماعيني تلدي=كل شيء بدنيتي لونه رمادي
يآآه .. باهته الدنيا لا لون لها ولا احساس عدم الشعور بالقليل من السعاده شيء يقتل يقتل يقتل ! فـ يصبح كل شيء بالعين بغيض .. مرير لا يدعو الا للبكاء والحزن آه من درب يجيب.. ولايودي ....................آه من درب يجيب.. ولايودي ........................................آه من درب يجيب.. ولايودي آه من درب يجيب.. ولايودي=صار لاهو لاضياع.. ولارشادي وآه من جرح الملامه والتعدي=وآه من مبدأ نصيبي.. واجتهادي كلما قامت تفاكيري تفدي=صرت في وادي وخلق الله بوادي!! صرت لاني لاضرير ولامقدي=لون ثاني لابياض ولاسوادي؟ ماعشم هذا الوطن ... .....=ولاحسب وجدي ولاناله ودادي بس لعيونه نخليها تعدي=عدها الشرهات يارجال عادي لن تبرح مكانها الا بـ تصفيق حآآر بيدٍ من القلب ويدٍ من الروح مشوار طال لم نشعر بـ عناءه .. امتد بنا في قافلة تنعطف جمالاً وروعة في الكلمة والنغم طرباً في الأداء .. رحلة بدأت من محطة فكر وتوقفت في آخر سكه لبحرٍ من دُرر ! |
شرهة ذيابي !
يالله ؟ نبي نسمع [ شعر نبي نقرا قصيد ! مآبه جديد كود .. الذي يشرح صدور الخلايق ! بالحقايق وبـ غير الحقايق غَن ياعادل للهوى للريح .. لاشجار الحدايق مدلنا يدينك ! " شعر " مدها قصيد ، عصافير ، مطر و زهور قصيدك بالليالي نور ...........قصيدك بالليالي نور .....................قصيدك بالليالي نور وصل ركب الرحيل لشاطئ الغربة ودار اجناب=بعد طول الطريق اللي تمادى.. واتعب اركابي ضحك وجه المدينه للمسافر والوجيه أغرااب=وانا عابر سبيل وضحكتي ماصافحت نابي وقفت انظر على شط المدينه .. والجروح أسراب=ولعنت ( أم الحنين) وسالت الدمعه على اهدابي هنا كنت الغريب .. بلا حبيب..ولاوطن ..واقراب=حزين وماقدرت اجمع شتاتي ..واحسب حسابي حداني للسهر جرح(ن) سجني بين ناااب .. وناااب=وتركني بين صمت الذكريات بصفحة كتابي حبيبي والغلا جرح(ن) ذكرته وانفتح له باب=وانا لوماذكرتك وانت ناسي .. ويش يبقابي صحى هم الفراق ..اللي فتح للذكريات ابواب=وغفيت وماصحيت الا وطيفك يطرق ابوابي ؟ حبيبي ترسم الغيمه ملامح وجهك الجذاب=واشوفك وين مالد النظر مع كل هندابي !!! ذكرت اول لقاء فيه اجتمعنا بالغرام احباب=الين آخر لقا منه افترقنا .. وآخر اتعابي فداك الجرح ياوجه(ن) تركني للملام وغاب=بقاله في حياتي طعنتين .. وجرح ماطابي !! انا اللي كنت اضيع بنظرتك شوق..ووله .. واعجاب=واظيق بغيبتك..وتظيق بي دنياي ..وثيابي عطيتك قلب ..واشواق..وحنين ..وفيك ظني خاب=احسب انك تمنى رجعتي.. واثرك تسلى بي !! تبعتك مثل ضحضاح السراب ..وجيت لك مرتاب=واشوفك مثل الامس المستحيل .. وباكر الغابي؟ حبيبي وانت ماتسوى ملام..ولاانت قد عتاب !!=تعداك الملامه .. والعتاب.. وشرهة ذيابي ؟! خطاي اني تماديت بغلاك .. وماحسبت حساب=احسب ان الوفاء طبع البشر!! .. واحبابي ..احبابي !! وعزاي اني ردعت القلب عن باقي غلاك وتاب!!=وصحى في داخلي طفل(ن) غرير!! .. وشايب اعرابي !! حبيبي للصبر بال(ن) طويل وللجروح اسباب=وانا مارحت ادور للجروح .. اعذار.. واسبابي حبيبي يوم شفت ان الزمان برجعتك كذاب=تركتك للتجافي .. والغرور .. بزحمة اصحابي رحلت وقلت اسافر عنك ..واجزيك الغياب ..غياب=واببعد واستريح من السهر.. واريح اعصابي !! هجرت ارض الجروح ابغى عن تراب الجروح..تراب=عساي انساك ..وانسى رجعتك .. والجرح.. وترابي!! يطيب الجرح والا ياعسى جرح الهوى..ماطاب=تفضل هاك جرحك..واستريح .. وجرحي اولابي !! طلع صبح الفراق بشاطيء الغربه ودار اجناب=ولعنت ام الحنين وسالت الدمعه على اهدابي !! خلوني بنشوتي لاحد .. يصحيني ! |
مذكرات غآوي
لاتنحرج ماجيت اسبب لك احراج..=قلبي عقب فرقاك زاد انحراجه..! انت الوحيد اللي له القلب محتاج..=وغيرك ترى مالي بهالناس حاجه.. ان ظقت ظاق اليم بعيون الامواج..؟=واليا ابتسمت..الكون يضحك حجاجه ..! دنيا بدونك كلها هم وازعاج..=فيها ظلام العمر يطفي سراجه.. لاجيت يمي صار للظيق مخراج=ويعود للقلب الحزين ابتهاجه ولاغبت ظيقة خاطري مالها أفراج..=بيديك صارت ظيقته وانفراجه لك في صميم الذات مسرى ومعراج=ولك مملكه فكري وعرشه وتاجه ان كان لجروح الغلا طب وعلاج=انته طبيب الجرح وانته علاجه |
خريف العمر .. بـ نآي لا يُسمع
|
سلام الله سلام يجذب الساري على المسفار=سلام اصدق من العلم الوكاد ابيات مرموقه سلام يجبر الخاطر ويكسر شوكة الغدار=يدافع ضد تيار الشكوك ويعلن عقوقه هلا بالشاعر اللي يوم غنى لاذ خلف استار=وهو مايدري ان الله غني عن وجه مخلوقه رفيق شال له سبجه طويله واليدين قصار=وانا خوفي يلوح بسبحته وتصير مشنوقه ارحب به تراحيب السجين بشوفة الزوار=نظر من خلف قضبان الحديد وشاف معشوقه اشبه جيته مثل السنين الممحلات قفار=سنين عجاف ماتسقي هزيل الغصن وعذوقه صدوق اللي يقول الدمع يفضح والرجال تغار=وترى الحاجب حشا مايرتخي لويرتفع موقه على صوت ارتطام الموج جيت انشد عن اللي صار=لقيت البحر يطرد موجه الطافي عن عموقه وعني باب الذنوب ومفرق التوبه وقفت اختار=سلكت اسلم طريق لدنيتي والخلق مرزوقه قريت ابيات هزت ساكني واشعلتها باصرار=قصيدة تستبيح اعلى الرجوم وتشرب مروقه توارى فوق هامات الورق صوت صدى واسرار=مشاعر جايشه ظلت بوسط القلب مخنوقه مدام اللي خلقني حط لي هيبه ولي مقدار=انا ليه ارتخي والبس ثياب قصار ممزوقه انا الصوت الصدى نبض القصايد شاعر اهل الغار=انا اللغز العجيب اللي كتم حله بصندوقه ابيك تكون واضح قبل لاتحكم على الشعار=ومثلك مايحب اللي لهم وجهين ملفوقه تبي تشرق شموس وينجلي ليل وتطفي انوار=وتبي تبرن حقايق غامضه بااوراق موثوقه تبي تاقف خطاوي عاجزه عن قفلت المضمار=والا واعزتي للي يصيح وتنشق ريوقه انا ماجيت ابيك تشيلني وتوجه الانظار=اناجيتك مثل شمس الضحى والصبح بشروقه اذا بيتك زجاج احذر تصيب الناس بالاحجار=تاكد قبل لاتصبح رهين اوضاع مزنوقه لك الله جيتني كلك ذنوب وجيتك استغفار=تلافيت الشماته والخطا وابيات مبيوقه ترى الجنه تبي والنار تبغى والفلك دوار=وترى بعض الظنون ذنوب والله عالي طوقه وانا جيت انشدك يالشاعر اللي حدني للثار=عن اللي حسب نبضه لكلام وضاعت حقوقه اهو ميت يشلونه ثلاثه وابتدا المشوار=وعلى قد الكلام اللي يقولونه تنزف عروقه بديت ابيات شعري واختتمها بالسلام الحار=على هاك العيون اللي لها نظرات مشفوقه |
| الساعة الآن +4: 06:55 PM. |
Powered by vBulletin® Version 3.8.2
Copyright ©2000 - 2024, Jelsoft Enterprises Ltd.
