يوم صرح محيط البحر ماذا دهاه=هرج فاضي لقيته ضمن ذيك الردود
كيف تحكم عليها وانت فيك اشتباه=لا تحكم القضيه دام مالك وجود

صاحبك صاحب قول الصراحه خطاه= لو ماله مع البدوان شاه وقعود

لاتعاند قرار المحكمة والقضاة= روح يالمدعي حضر ثلاثه شهود

أنت رجل موصى لاتضيع الوصاه= الشجاعة تغذيها الحيل والجهود

كل شيخ على قده لبس له عباه= لاتلبس صحيبك من بشوت الزيود

الليالي تدور ولا تدوم الحياه=والجبل ثابت ن ماحركوه القرود
انت مثل القمر لو شع عالي سماه=واصل ن يم نوره لو بنيت السدود

أنت طرطنق ماأعرف خشته من قفاه=جيت من ديرة البنقال والا الهنود

المواقف بعضها ماوراها غناه=يقطع الله نسلك يالذلول العرود

كاس شاهي منعنع لو زايد حلاه=اشربه من يمين الطيب الي يجود
هيه يلي تحسب الشعر لجنة زكاه=طافك اثنين يارجال كافي رقود

بس من يشرب الفنجال تسلم يداه= وأنت يكفيك كوب الشاي الاسود وزود

تحسبنك نجيت ولا حصلك نجاه= صرت في ساحة الميدان مثل الهبود

لغز (شيخك) و (نوره) جعل راسك فداه=هذي قصه قديمه من عصور الجدود
الطبيب المعالج لو يعالج دواه=ليت فاد البليد الي بدمه برود

كل قصد (ن) ترانا نعرف الي وراه= لاتزيد الهروج اللي تعل الكبود

والله أنا ليا قمنا طرحنا الجناه= لو تجي فالبحر والا تجي فالنفود

فسر الي كتبته فسر الي نباه=والليالي تجارب وستفد يالشرود
انته اصغر من الارنب وسبق القطاه=ما تصيده الجموس ولا تصيده الفرود

يبني السمر لكن وشو اللي بناه = حفنة الطين زلناها براس العمود

وأنت مثل الجمل لكن مالك لهاه= كل ما نضربك بالخيزرانه تهود

خاسر المعركه دايم يرقع خطاه=خيلي يامخايل ورعدي يارعود
انت يالذيب يلي ماسمعنا عواه=استرح بالفيافي بعد فك القيود