وقت رجم الشقا من عرض من واق فيه=وسبقوني على متنه قروم العيال
بين نمة حسود وبين هذرة سفيه=اتّـكـالي على المحيي عزيز الجلال
الوفاء ماشيٍ به والردى محتريه=حسبي الله على الهقوه ومكر الرجال
والخطاب المبطّن والسؤال الوجيه=كلبوهن لهن مغزى وجمله تقال
ومجلسٍ مايقدّر خطوتك لاتجيه=حط بينك وبينه برزخ الأعتزال
روّض النفس وأردعها عن اللي تبيه=وكان طاوعتها غنت على ليل لال
وأعطها فرصه المسجون لمزاوريه=ودفها دفة الطاغي لمستور حال
قبل تفهم غلط معناي عرّج عليه=بكره النفس تسأل عن حرام وحلال
يامساعد ربيع يابو فيصل ياهييييييه=خذ عن الوضع نبذة ياكريم السبال
ياولد من تمد الجود راحة يديه=ياغصن دوحةٍ يلقى تحتها الظلال
مستحيجٍ ريال ووسط جيبي جنيه=ولازم أصرف جنيه لحاجتي بالريال
أتخذت القرار الصعب ماقلت ليه=شيٍ أكبر من الواقع وحلم الخيال
المهم أرتكيت بمرقبٍ منت أبيه=رغم طعن الزمان وضحكة الأحتيال
وأي طيب نزيه أنا خويه وأخيه=لين حمر النثايل فوق قبري تهال

شرف الرجم (عيد) وجابن العيد فيه=مرهفات الهجوس ومفحمات الخيال
وأنصرف مثل (نوٍ) عاقدٍ حاجبيه=لين هلهل عثاكيل برديه وسال
أقبل البرق قبله والرعد مقتفيه=والسعد من يمينه والفخر من شمال
كنه اللي تغافلني وأنا محتريه=من مغيب الهلال ليا طلوع الهلال
لين قام يتصافق من حديه لحديه=قلت هذا (ولد مربح) بليا جدال
أثر مافيه لا حيله ولا له شبيه=مير يامرحبا به يوم نادى وقال
(يامساعد ربيع يابو فيصل ياهيه)=عد مانسنس الغربي وشعشع ظلال
شاعر ضيق الفرصة على منافسيه=كم كتب بيت شعر وصار مضرب مثال
كل ماهو لديهم بعض مما لديه=أن بغوها حميا وأن بغوها عدال
وصاحبٍ عند وقت اللازمه محتسيه=يوم مال الثقال إلا ظهور الجمال
كاربات عزومه فتٌل ساعديه=مرتوي عز نفس وممتلي طيب فال
كل عبسي يعرف أفعال جده وأبيه=مثل نارٍ لها في راس (أبان) آشتعال
كنه الجدي في ليل السري نقتفيه=وكنه المارد العذب القراح الزلال
يارفيق لفاني منه شعر عليه=ختم جودة (قلادان) الظفر ماتزال
شعر شامخ معاني فاردٍ منكبيه=كامل أوصاف بأمر الله عزيز الكمال
خل صدرك على الضيقات خبت نفيه=لا يجي للحسوفه في حياتك مجال
ماش عذر وجيه لباردين الوجيه=باهتين الحميا قاصرين الحبال
مايعكر مزاجك غير رجل مليه=مايسد بلزوم ولا يعز ،، بوصال
أحقره حقرة العاله على والديه=وسط مجلس تمركو به زحول الرجال
لا تطيل النظر في كل وجه كريه=وحط في كل عينٍ ما تودك خلال
أما أنا يارفيقي موقفي محتميه=في جميع الظروف وفي جميع الحوال
لا توصي حريص ولا تفطن نبيه=مدرك للأمور وحاسب للهبال
ماتزحزحت شعره عن مرامٍ نزيه=آتساهله لو شافوه صعب المنال
منتهى المجد عمر بالوفا تبتديه=ومنتهى الذل من حط الردي راس مال
لا أنقطع حس (عيد) ولا عدمنا وحيه=يوم غنا بعذبات الطروق الجزال
وبعد ماتوج أمجاد القلم بأصبعيه=ذا مردي ،، وهذي غترتي والعقال

عيــد ابن مربح ينااادي بكل عزة وفخر بمعاني يعجز الشاعر عن حلهاا
و مســاعد ربيع يجيب النداء بكل حكمة وبكل حمية بحنكه وفخــر ..


رمزين لـ بني عبس لا ثلاث لهم وان وجد فهو ابن شبيب
الله لا يحرمنااا من طلتهم وابياتهم
الزعيم وابن مربح هل بشعرنا غيرهم او بمثابتهم لا اتوقع
منتهى المجد عمـر بالوفـا تبتديـه...
.....ومنتهى الذل من حط الردي راس مال

لا تــوصــي حــريــص ولا تـفـطــن نـبـيــه
مــــــدرك لـــلأمــــور وحـــاســــب للهبـــــــال

مـاتـزحـزحـت شــعــره عــــن مــــرامٍ نــزيـــه
آتسـاهـلـه لــــو شــافــوه صــعــب الـمـنــال

***

كفوووو يا بو فيصل

صح لسان الشاعرين الرائعين وتسلم على النقل