ياللي هويتك والهوى بعض الآفات = يومٍ عيني منك حظّي حرمها
ما عاد لي غير التباريح وآهات = تنفث من أعماق الضماير حممها
يا أول غرام القلب وأحلى العلاقات = قبلك وبعدك ما عرفنا طعمها
يا ليت لي منّك لقا لو للحظات = واسألك تبعث مهجتي من عدمها
وتغيث صحراي ابمزونٍ مهلات = عشان ينبت في عظامي لحمها
وأبث لك شوقٍ له سنين ما مات = واهج لهيبه بالحنايا حطمها
وآ طرفي اللي من لظا الشوق ما بات = وا روحي اللي طول بعدك سقمها
من عاطفه من لوعة البين تقتات = وتكبر الى ما زاد قاسي ألمها
قتلت عاشق ينتظر منك مدّات = عاشق ثلاثين الصبا ما ختمها
يوم الخبر جاله وبالقلب غفلات = كن الجوانح رمح حامي خرمها
قالو تناسى واعتبر ما مضى فات = وحاولت لكن شوق روحي هزمها
ولسلوتي لا قمت أبنّي بويتات = جا همّي ابجيش القساوه هدمها
هويت من طولي بقاع الشقاوات = وان نعست عيوني فؤادي نهمها
غير اني اخايل جبال المسرّات = وراجيك عل تعود واسكن قممها

ابعدتني والقلوب البشر مجتمعه
دايم وانا القاك دايم وانت مغديني .
. ادور انا وانت مثل السبت والجمعه
ياقربنا والصحيح انا بعيديني .