سلام ياشاعرن جتني تعابيره=انا اشهد انه عزيز وصاحبن غالي
لا غاب عني يطرشلي معاذيره=مسموح مني عريب العم والخالي
من شان طيبه ومعروفه وتقديره=يستاهل الاوله وانا ترى تالي
يابو علي وش تبي وابشر بتيسيره=مادام قدرك كبير ومنزلك عالي
وفرخ العصافير خله مع عصافيره=يسرح ويمرح بدنيا مالها والي
اللي على ادنى سبب تعصف معاصيره=ويسبب الضيق لصحابه والا يبالي
طفل صغير ويخالط عالم صغيره=يحسب جميع الليالي طعمها حالي
خله يفارق ترى في فرقته خيره=لا ترتجي واحدن حول وهو عالي

حييت يامرحبا ياطيب السيره=ياصاحبٍ له بوسط القلب منزالي
فيك الوفا يالوفي ياصعب تصويره =اكبر من حدود فكري طيب الفالي
لازلت حافظ حقوق الطيب والجيره=وتبقى معك ثابته في كل الاحوالي
مرزوق قدرك كبير وجودك ايديره=(رجال واحد يساوي الف رجالي )
ياصاحبي لو نرد العلم وانثيره=ترسي بواخرك دايم مابه اجدالي
واللي على البال يطري ولد الحيره=من بعد مارسلتله مارد مرسالي
عجزت لا القا مع الايام تفسيره=قطع الوصل والغموض وضيقة البالي
لكن سهله وانا ماأبلش بتدبيره=لاصرت دايم معي ماني انا لحالي
والوقت قدام يجمعنا بتدويره=واذكره قصة الوافي مع الخالي