ناس ٍِ تجيب الهم وناس ٍ تزوله=وناس ٍ لها من دقة الباب مقصود
وناس ٍ تبي شي ٍ وهي ما تطوله=وناس ٍ تحصد الزرع والزرع محصود
وناس ٍ تبي تصبح نجوم البطوله=والعرف فيهم خابرينه ومعهود
وناس ٍ تراها بالمواقف صموله=عز الخوي والمدح فيهم ترى يزود
والحر يبقى عند هرجه وقوله=دايم على درب الوفا يمشي سنود
وان ماعنى للناس جوه وعنوله=كنه على كسب الفخر صار محدود
ومسكة رسن خيله أصيله جفوله=يبيلهاا خيال يسرد لها سرود
قد قادها جده بحرب الحموله=وخاله وأبوه والعلم ثابت ومشهود
وما كل من ينوي يثبت وصوله=بعض البشر الصبر عنده له حدود
وأنا أخذت بعالم العز جوله=وقادتي خالي وأبويه والاجدود
أبوي قال : أبعد عن اللي فعوله=فيها الردى والذل لا تصير مصدود
ومن يفعل الشينه حذيرك تعوله=دربه ترى دايم ردي ٍ ومسدود
وخالي يقول : أختار بنت ٍ جفوله=مردده من نسل معروف معدود
توفي ولو غيابكم صك حوله=ولا شفتها راغت كما ظبي مطرود
بنت الحمايل وافيه وخجوله=وذكر اهلها من نبا العيب مجرود
وختامها مني نصيحه بقوله=خلك عزيز النفس وافي بالعهود