قبيلة بني رشيد - ღ ..حلم وردي.. ღ

(البـــــــارت الثـــــــــاني عشر)

كانت ندى جالسه في إحدى الطاولات عند الكافتريا حين وصلت هند ونوره.

نوره "صباح الخير"

ندى"صباح الورد..هلا والله"

غضنت هند جبينها"وين نوف؟!"

ندى "ما جت معي شكلها غايبه اليوم"

نوره"والله إني كنت ناويه اليوم أغيب لكن غيرت رأيي في آخر لحظه"

غمزت هند لنوره قائله"بدينا بحركات العرايس"

شهقت ندى بسعاده"مبرووووك متى الملكه"

قالت نوره بخجل"الخميس الجاي"

قالت ندى"يعني باقي ثلاث أيام...يالله يمدينا نشتري فستان للمناسبة هذي"

هند"والله لو على كيف ماجد..كان أخذها من يوم الملكه ..هو يقول ليش نسوي حفل زواج؟...آخذها من

الملكه"

صرخت نوره"لا يا شيخه...رخيصه أنا ياخذني كذا بدون حفل زواج"

قالت هند بهدوء"والله أخوي مو منتظر الإجازه الجايه"

نوره"ومن قالك الإجازه الجايه..الله لا يهينه ينتظر لين أنتهي من الكليه"

هند"ههههههههههه اسكتي لا يسمعك...والله تجيه سكته قلبيه"

ندى"خلاص إنتي وياها..ما صارت تقل دجاج"

هند"هي دجاجه....أنا أوزه"

نوره"لا والله ..يناسبك اسم بومه"

هند"هههه وأنتي فاره والله ما أخلي لك وجود...مع أول وجبة عشا"

ندى"يووووه وبعدين معكم....إيش خليتم للأطفال"

هند "هههههههه خلينا لهم حلاو مصاص وفشار"

قالت نوره بهمس"المشكلة إنه دولابها مليان منه"

هند بتحدي"إحلفي"

قالت ندى بسرعة حتى تغير الموضوع "إيش رأيكم نروح اليوم للسوق"

نوره "أنا بروح اليوم لمحل (البرت) في الحياه مول...وبعدها محل (سرافيا) في العليا يمدحون فساتينه"

وضعت هند يديها على خصرها "ان شاء الله ناويه تروحين بدوني؟!"

نوره بهدوء"لو أروح معك ما أخلص..وأنا وقتي من ذهب...وبعدين إنتي إخت المعرس ..يعني

المفروض ما شوفين فستاني"

هند"نوير ..أشوفك بديتي تشوفين حالك علينا"

ندى"هههههههههه من حقها يا هند"

هند"إيه.... بنت عمك وتدافعين عنها"

ندى"ههههههههه خلاص هنوده نروح حنا سوى"

هند"اتفقنا..وخليها تروح وحدها للسوق..وان شاء الله يا رب يخطفونها مجموعه إرهابيه..وتدور عليها

الحكومه..ما تلقى لها أثر....وبعد عشرين سنه نلقاها في مجاهل أفريقيا ...."

نوره"بسم الله علي ..هنودوه كل هذا مخبيته في قلبك؟!"

هند"من قهري..ليش ما تخلينا نروح معك للسوق"

ابتسمت نوره برقه قائله" بمر على ساره آخذها معي"

في تلك اللحظه دخلت شذى وريم الكافتريا واختارتا طاوله بالقرب من مجموعة ندى. كشرت نوره بينما

رفعت هند رأسها بتحدي قائله"نفسي أسوي فيهن جريمة تشويه....يحاولون أهلهم يتعرفون على

ملامحهن ما يقدرون"

ضحكت ندى ونوره...ثم قالت ندى"أخبار ساره؟"

تنهدت نوره قائله"ما أدري عنها...لها أسبوع ما جت...ولا كلمت..ولما أدق على جوالها مقفل"

ندى"طيب ما فكرتم تزورونها"

نوره"أفكر أجيها اليوم آخذها معي للسوق"

هند قالت بتعجب" خالتي أم فيصل ما فكرت تزورها بالبيت"

قالت نوره بابتسامه جانبيه "أمي عايشه حياتها الخاصه ومو داريه باللي حواليها...وهي حالفه ما تدخل

البيت وفيه النسره"

اتسعت عينا ندى" منو النسره؟!"

هند"ههههههههههه تقصد أم تركي..أنا من ناحيتي أسميها الدب القطبي"

اقتربت هند من نوره وندى قائله" معي شي ممنوع بالشنطه...إيش تتوقعون؟"

شهقت نوره"مخدرات"

ضربت هند كتف نوره ثم صرخت في وجهها" يا حيوانه ...وأنا عندي الحركات هذي..أنا لو أحط (مره)

بشنطتي قعدت أتراجف أخاف يكشفونها"

نوره"ما أدري عنك..مهبوله ويتوقع منك أي شئ"

هند"طالعه عليكِ....الله يعين ماجد علينا..عز الهن ندخله مستشفى شهار بيومين"

تنهدت ندى قائله"ردينا...يالله يا القطاوه إخلصن"

قالت هند بهمس"معي جوال كاميرا"

شهقت ندى"يقولون ممنوع بالكليه"

قالت نوره باستهزاء"لو يعرفون الممنوع..كان منعوا بدور وشلتها"

اقشعر جسد ندى من ذكر اسم بدور...فتلك الفتاه لن تدعها لوحدها...

شغلت هند أحد المقاطع وكان عبارة عن مشهد تفحيط ...

قالت نوره"الحين أنتي تشوفين الأشياء هذي أنتي ووجهك..والله بديت أشك في عقليتك...مالت ,جوال

كاميرا وسريه وآخرتها تفحيط "

هند" ما شفتي شي..لحظه تشوفين مقطع رقص روعه"

لاحظت ندى أن شذى نهضت من مكانها وخرجت من الكافتريا..فهمست"انتبهوا..شذى شافتنا..والله

العالم ايش ناويه تسوي"

هند باستغراق" ما عليكم منها..أبي أسمعكم مقطع طقاقات..شي"

نوره"إيه هذا قدرك يا الطقاقه..لا يكون تبين تشتغلين طقاقه بعد التخرج"

هند" والله فكره...قسم بالله لأبني فله بسنه...هاه تطقون معي"

نوره باستهزاء"إيه...وسميها طقاقات الكليه"

هند"لا الإسم مو مناسب...إيش رأيكم نسميها فرقة نهاوند فاسم حلو وفيه حروف إسمنا"

نوره"والله إني شاكة فيكِ من زمان...ما هي غريبة عليكِ تسوينها"

ضحكت ندى وهند بمرح...لفت نظر ندى رجوع شذى ونظراتها المنصبة عليهن المليئه بالحقد...دققت

النظر فيها وفهمت ابتسامتها الشيطانيه...خطفت ندى الجوال من يد هند ثم أغلقت الجهاز...

ارتاعت هند"ايش فيكِ يا ندى؟!"

قالت ندى بسرعه "اصبري علي"...أفرغت كرتون المناديل ثم وضعت الجهاز في داخله ووضعت

المناديل فوقه ثم رمت بالعلبه في سلة المهملات...كان ذلك أمام عينا نوره وهند المندهشتين...

لم يمض على جلوس ندى ثانيه إلا ويتفاجئون بحملة تفتيش مفاجئة ..تم تفتيش جميع من كان في

الكافتريا..تطلعت هند إلى ندى بنظرات شكر وامتنان.

تم تفتيشهن بدقه ولم يجدوا شيئاَ..إبتسمت نوره وهند وهن ينظرن إلى شذى والتي بدورها كانت تغلي

من الحقد.

بعد خروج المفتشات..نهضت هند فأمسكت ندى بيدها قائله "لا تاخذين الجوال الحين...خليه في نهاية

الدوام"

"لا.... في بالي شي ثاني"هذا ما تفوهت به هند بغضب.

إقتربت هند من طاولت شذى ولحقت بها نوره وندى...وقفت شذى مشدوهة ثم قالت"خير..ايش جابك؟!"

رمت هند الكرسي ثم قالت لشذى "مشتاقه لك"...أمسكت بياقة شذى وقالت"يا بنت الـ؟؟؟؟؟؟؟؟؟علمتي

علينا..ناسيه مصايبك بالكليه"

صرخت ريم باستنكار "هيه اتركيها"

قالت هند بتشدق"اسكتي يا فرخ الجن..حسابك بعدين"

اقتربت هند من شذى قائله"انتبهي تحطين راسك براسي..وإلا لا تلوميني على اللي أسويه فيكِ"

قالت شذى باستهزاء"ايش ممكن تسوين؟!"

اقتربت هند أكثر قائله"تبين تجربين"

أمسكت نوره بكتف هند ثم أبعدتها قائله "هنوده..لا تنزلين نفسك لها"

مسحت هند يديها ثم قالت"فعلاً الحشرة لوثتني"

قالت ريم بتسرع" أكبر خطأ سواه تركي إنه ناسبكم"

أغمضت نوره عينيها ثم تنهدت..إقتربت من ريم وأمسكت بعلبة البيبسي المفتوحه ثم أفرغتها فوق رأس

ريم التي كانت تصرخ بجنون.

صفقت هند بمرح وقالت"كفووووو سنايدي"

قالت ندى "بنات والله تجاوزتم حدودكم...خلونا نطلع من الكافتريا"

تحركت نوره وهند وقبل خروجهن من الكافتريا..لاحظت هند وجود بدور ومجموعتها...إقتربت منهن ثم

قالت" مبروووك يا بدور لقيتي وحده معجبه فيكِ..." ثم أشارت على شذى.

************************************************** ***
كانت الساعه تقارب الرابعه عصراً حين اقتربت ندى من غرفت نوف .طرقت الباب بخفه وحين لم تسمع

رد ,فتحت الباب بهدوء.

وجدت نوف مرميه فوق سريرها وهي تبكي. شعرت بسكين ينغرس في قلبها ويؤلمها..

اقتربت من السرير وجلست بالقرب من نوف قالت بهمس"نوف..أنا آسفه"

رفعت نوف رأسها ثم صرخت"اطلعي برى ..ما أبي أشوفك بغرفتي"

إبتسمت ندى وقالت في نفسها..ما كنت أدري يا نوف إنك طفله بجسم امرأه....رن جهاز نوف بالقرب من

ندى..نظرت ندى إلى الشاشه وكان المتصل (ازعاج)...غضنت ندى جبينها ثم قالت لنوف "فيه أحد

يزعجك؟!"

رفعت نوف الجوال ثم صرخت في وجه المتحدث"نعم...ايش تبي مني؟!"

المتحدث "اهدي يا نوف"

نوف"اللهم طولك يا روح...يا اخي لا تتصل كم مره قلت لك"

المتحدث"مو على كيفك...اللي بايدي ممكن يفضحك"

شهقت نوف بالبكاء فقد حصل السارق على صورتها في المحفظة ...

المتحدث"إهدئ يا نوف..كلمة وقلتها أبي أشوفك أو صورتك راح أنشرها بالنت"

صرخت نوف"حرااام عليك...ما عندك خوات..ما تخاف الله"

قال المتحدث بتشدق"عندي خوات لكن محافظات...ما يحطون صورهم بالمحفظة"

نوف "هذا انت قلتها..ـأنا نسيت صورتي ما عطيتها أحد "

سحبت ندى الجوال من يد نوف بحزم ثم أغلق الجهاز...تطلعت نوف الى ندى برعب ثم قالت "إنتي ايش

سويتي؟!"

قالت ندى بهدوء"الأشكال هذي ما يصلح معها المساومة"

صرخت نوف بعذاب"انتي ايش دخلك بحياتي؟!"

ندى"لأن سمعتك يا بنت عمي من سمعتي....شوفي هذا ماله إلا حل واحد"

هدأت نوف قليلا ثم قالت بعد برهه "إيش ممكن أسوي معاه؟"

ابتسمت ندى برقه"ماله حل الا الهيئة"

شهقت نوف"إنتي تبين تفضحيني"

قالت ندى بهدوء"ردك عليه هي الفضيحة بعينها...أنا راح أكلم الهيئه وأعطيهم رقمه وبعدها كل شي

بيمشي مثل ما نبي.

أخذت ندى الرقم ثم تحدثت الى أحد رجال الهيئة عبر جوالها لتصف له المشكلة ثم أرسلت الرقم ..فما

كان منه إلا أن وعدها بحل المشكله بسرعه وسريه.

اغلقت ندى هاتفها وقد على محياها الجميل ابتسماة عذبه ..قالت نوف بتردد"كذا؟! بكل بساطه"

قالت ندى"أي بنت تتعرض لتهديد..اذا ما قدرت تكلم أهلها فالأفضل تلجأ لرجال الهيئة"

بلعت نوف ريقها ثم قالت بتردد"إيش ممكن يسوون معاه"

لم تكمل حديثها إلا وهاتف ندى يرن ...ندى"السلام عليكم"

المتحدث"وعليكم السلام...بعد البحث وجدنا ان الرقم مسجل باسم هندي...هل فيه رقم آخر تكلم منه"

ندى"لا...هذا الرقم اللي أعطيتك إياه...المشكله إنه معاه صورة كانت في المحفظة "

سكت قيلا ثم قال"ما فيه الا حل واحد..عشان نحصل على الصوره..وهذا المهم"

"ايش هو؟"

المتحدث "انك تستدرجينه لأحد الأسواق وتواعدينه في مكان معين..بعدها تاخذين اوصافه..وهناك راح

ننتظره مع أحد الشرطة"

ندى"ان شاء الله" أغلقت ندى هاتفها..ثم أعطت نوف الهاتف وقالت لها بحزم "كلميه" شهقت نوف

قائله"مستحيل"

ندى"اذا كنتي تبين صورتك ..كلميه وواعديه بأحد الأسواق في مكان تحددينه أنتي..ولا تنسين تاخذين

أوصافه..وهناك الهيئه راح يكون له بالمرصاد"

رفعت نوف هاتفها ثم تحدثت الى المزعج وواعدته بأحد الأسواق المعروفه بالرياض..بعد أن أغلقت

هاتفها تحدثت ندى مره أخرى الى رجل الهيئة وأخبرته بما حدث وبأوصاف المزعج...تنفست الصعداء

حين وعدها خيرا...

بعد أن أغلقت ندى هاتفها رمت نوف بجسدها في حضن ندى ممتنه...بينما إبتسمت ندى قائله في

نفسها"وأخيرا يا نوف"

************************************************
كانت هند ترتب غرفتها حين دخل عليها خالد كالإعصار....خالد"مرحبا يا أحلى إخت بالدنيا"

هند"بدينا بالنصب"

خالد "والله اني أحبك يا اختي العظيمه"

هند"لا تتعب حنجرتك ..ما عندي فلوس"

خالد باستضعاف"تكفين يا الغاليه..مية ريال بس"

تنهدت هند قائله"قلت لك ما عندي فلوس"

خالد"أنا شايف أبوي البارح معطيك فلوس عشان السوق"

هند"هذا كان البارح..يعني فعل ماضي...واليوم خلصوا"

طأطأ خالد رأسه بانكسار ثم قال" طيب..مالي نصيب اليوم" حين وصل الى الباب سحب المفتاح بخفه ثم

أغلق على هند باب غرفتها.

أسرعت هند لمحاولة منعه ولكن كان قد فات الأوان...صرخت هند قائله"خويلد..افتح الباب"

خالد "ههههههههههههه..لا تحلمين..عطيني المية بالاول"

قالت هند بمكر"طيب كيف أعطيك الميه وانت مسكر الباب"

قال خالد"بسيطة مديهم لي من تحت الباب"

ابتسمت هند قائله"والله وطلعت ما انت هين يا خالد"

ثم أعطته النقود من أسفل الباب ليعطيها المفتاح بدوره من أسفل الباب ويولي هاربا.

ضحكت هند ثم عادت إلى ترتيب غرفتها ليفاجأها رنين الهاتف.

تطلعت إلى الرقم ثم إبتسمت"هلا نوره"

فيصل"يا ليتي نوره..وتقولين لي هلا"

صرخت هند"فيصل؟!"

تنهد فيصل قائلا "ومن غيره معذبته وذابحته"

هند بعصبيه"انت ايش تبي؟"

قال فيصل بهدوء"انتي تعرفين أنا ايش ابي بالضبط"

هند"لا ما أعرف..بعدين انت مو خلاص خطبت نوف..ايش تبي فيني"

ابتسم فيصل وقال برقة"هل أسمي هذي غيره"

هند"وع...أغار عليك أنت؟! ليش انهبلت أنا!"

فيصل"لا والله أنتي اللي مهبله فيني أنا"

هند" لو سمحت ما يصلح تكلمني بالجوال"

قال فيصل بجديه فجأه" اسمعي ماجد ما راح يشم نوره الا بشرط"

شهقت هند"انت مو صاحي..ليش تبي توقف بوجههم ..مو حرام عليك؟!"

تنهد فيصل قائلا "واللي تسوينه فيني مو حرام"

قال هند بتردد"انت مو قادر تسوي شي"

قال فيصل"أقدر أسوي اللي ما تتخيلينه...تبين تجربين مدى صبري"

سكتت لبرهه وضربات قلبها تزداد ثم قالت "ايش هو شرطك؟!"

قال فيصل بهدوء"أنتي........" وكاد قلب هند أن يتوقف.

************************************************** ********
وصلت نوره للفيلا التي تسكن بها سارة...رنت الجرس ثم فتحت الباب حيث كان مفتوحاً.

دخلت نوره فوجدت ليلى متجهه إليها مرحبة بوجهها البشوش ..

ليلى"يالله حيها..هلا والله نوره"

ابتسمت نوره فقد كانت تميل الى ليلى وتشعر أنها مختلفة عن ريم ووالدتها "هلا فيكِ زود"

ليلى"تفضلي نوره حياكِ"

نوره"والله مستعجلة وين سارة"

صرخت ساره من عند باب المطبخ لدى رؤيتها نوره .تقدمت مسرعه ثم حضنتها..نظرت نوره إلى وجه

ساره عن قرب مصدومه"ساره...وجهك أصفر"

تنهدت سارة قائله"ما عليكِ مني...أمي وخواتي كيفهم...طلال كيفه؟"

أغمضت نوره عينيها ثم قالت"طلال من اليوم اللتي تزاعل فيه مع أبوي ما شفناه...حاول فيصل كم مره

انه يفاتح أبوي بالموضوع لكن بدون فايده..كان أبوي يصارخ في وجهه ويصده...أحس أبوي من ذاك

اليوم مو على بعضه من العمل لغرفته ما نشوفه...وطلال ما حاول يتصل فينا ولا مره"

شهقت سارة"يعني ما تعرفون وينه للحين"

تنهدت نوره قائله"انتي تعرفين طلال عنده عزت نفس وراسة يابس من يزعل مو سهله يرضى"

سارة"ما حاولتم تدورونه؟"

نوره"فيصل شاك انه عند أحد من أصحابه وهذا هو يا قلبي ..من العمل مباشره لين ينام وهو يدور

عليه عن الشباب اللي يعرفهم طلال بدون فائدة..وأمي دايم تهاوشة "

سارة"أمي الله يهديها ما تحبه...لأنها تعرف إن أبوي يحب أمه أكثر منها "

تنهدت سارة ثم قالت"الله يسامحك يا يبه...ويسامحك يا يمه"

قالت نوره"تعتقدين ان أمي لها يد بالموضوع"

سارة"ما أدري...لكن أشك"

انتبهت سارة الى ليلى والتي كانت واقفة بعيداً عنها ...قالت سارة"ليلى خوذي نوره لمجلس

النساء...لين أجهز القهوة"

نوره"أي قهوة أنا جايه أخذك معي للسوق"

اندهشت سارة"إيش المناسبه؟!"

ابتسمت نوره"انتي من تزوجتي وانتي منقطعة عن العالم الخارجي....سكتت قليلاً ثم قالت

بخجل..الخميس الجاي ملكتي على ماجد"

صرخت ساره"والله مبروووووك"

حضنت نوره وقد ترقرقت الدموع من عينيها ..اقتربت ليلى لتقول بصدق"الف مبروك يا نوره..الله

يوفقك"

نوره"الله يبارك فيكِ"

قالت ساره بتردد"تركي مو موجود ..راح يشتري لي جوال بدل اللي تعطل..وما أقدر أطلع بدون ما

أعطيه خبر"

قالت ليلى بسرعه" ولا يهمك اذا وصل أنا راح أقول له..وراح يعذرك صدقيني"

هتفت سارة"تسلمي يا ليلى...أجل بروح أغير ملابسي ونطلع"

صعدت سارة إلى قسمها ولحقت بها نوره...

خرجت أم تركي من غرفتها ثم سألت ليلى"ايش تبي نوره؟"

قالت ليلى"جت تاخذ سارة للسوق"

رفعت أم تركي حاجبيها"وتطلع بنت الأصول بدون ما تستأذن من زوجها"

قالت لها ليلى برجاء"يمه تكفين..لا تتدخلين بحياة تركي وسارة"

صرخت أم تركي بحقد"إنتي لمتى تبين تصيرين زي كذا ...عنستي وقعدتي بحلقي"

شهقت ليلى ثم جرت إلى غرفتها باكية ...بينما بدأت أم تركي تفكر بخطط شيطانية...

بعد خروج سارة ونوره للسوق بحوالي ساعة..دخل تركي وهو يصرخ بمرح"ساااارة"

سمع تركي صوت والدته تقول " يا المسكين..تدور عليها وهي ما هي معطيتك بال"

اقترب تركي من أمه والتي كانت تجلس بالصالة "ساره وينها؟!"

قالت أم تركي بهدوء"انت لمتى بتصير أعمى عن فعايلها"

قال تركي باستنكار"يمه ساره سوت شي خطأ"

تململت أم تركي ثم قالت بمكر"البنت ماهي معطيتك أهميه..اليوم طلعت للسوق مع نوره و بدون استئذان ...والله العالم بكره ايش ممكن تسوي"

تركي"عادي يمه..هي راح مع اختها"

صرخت أم تركي"كيف عادي؟ لو واحد غيرك كان طلقها..انت ما تعرف عنها شي "

قال تركي" يمه لا تظلمين سارة"

أم تركي بحزن مصطنع"الحين أنا صرت ظالمه...أنا أبي مصلحتك...البنت طول الأيام اللي فاتت

مكالمات من تروح لين ترجع..وبعدين كم مره أشوفها عند البوابة ...والله العالم من تكلم أو؟؟؟؟؟؟ يا

ولدي حنا حريم بالبيت وأنا أخاف على بناتي"

تركي"يمه...أنا أثق بسارة...يمه والله أحبها"

أم تركي"أكيد ساحرتك حصه وبنتها..."

تركي" يا الغالية إنتي تصدقين بالخرافات هذي"

شهقت أم تركي"كلام ربك مو خرافات....البنت مسويه لك شي"

تركي" أنا ماشفت منها الا كل طيب...يمه سارة مو مقصرة على البيت بشي ..."

أم تركي"يا وليدي دايم تحذف علي كلام والمطبخ كل البنات يشتغلون فيه ..وهي أكثر وقتها

بغرفتها..كأنها غريبة عننا ..وأنا إذا جيت أبكلمها...أبعدت عني وصدت"

قال تركي بهدوء"أنا راح أتفاهم معها"

همست أم تركي بفحيح كالحية"الزوجة با ولدي إذا ما خافت من زوجها تبي تلعب على كيفها"

تركي"يمه المسأله مو خوف...اللي بين الزوجين تفاهم ومحبه"

أم تركي"خل عنك كلام المسلسلات...لازم الزوجه تخاف من زوجها عشان تحترمه..لازم الزوج يعطيها

العين الحمراء"

سكت تركي وكانت كلمات أمه ترن في أذنه...

كانت الساعه حوالي الحادية عشره والنصف حين وصلت ساره إلى المنزل..كانت محمله

بالمشتريات وجدت أن الفيلا غارقة بالظلام..مشت بهدوء..وحين صلت إلى الدرج حين استوقفها صوت أم تركي " تحسبين البيت ماله رجل تروحين وترجعين على كيفك"

سارة "بسم الله علي...خوفتيني"

صرخت أم تركي بعصبيه" شايفه قدامك جن"

قالت سارة في نفسها لا والله الجني أهون منك ثم أردفت بابتسامة صفراء "مساء الخير خاله..عذراً

لكن الأمور هذي أناقشها مع زوجي"

رفعت أم تركي رأسها "وتردين علي يا بنت حصة"

سارة"تدرين يا خاله من جيتكم نادراً ما تنطقين اسمي ...كأن بينك وبينه عداوة"

أم تركي"أشوف فيكِ يوم يا بنت حصة"

سارة "خاله إنتي ليش كذا علي..ما قصرت معك كلام زين وقلته ومعامله بناتك ما يعاملونك مثلها..البيت شايلته فوق راسي..الطبخ أنا اللي أقوم فيه غرفتك أنضفها حتى ملابسك"

قالت أم تركي بتشدق"والله ما أخذك ولدي تركي إلا عشان تخدمينا"

سكتت سارة فالحوار مع خالتها عقيم ثم صعدت الدرجات في خفة ليرافقها صوت خالتها الحاقد"أوريك

يا بنت حصه تروحين وتتركيني" ....وصلت سارة إلى غرفتها وهي في قمة غضبها فقد هدمت أم تركي

سعادتها التي بنيت الساعات الماضية.

"وينك يا مدام ..كل هالوقت بالسوق"قال تركي غاضباً.

قالت سارة بهدوء"هلا حبيبي...مساء الورد" تقدمت من زوجها ثم ابتسمت برقة ومدت يدها بلعبة

مذهبه ثم قالت"شوف الساعة هذي وان شاء الله راح تعجبك"

رمى تركي الهدية قائلا "تبين تسكتيني بهديتك؟"

اتسعت عينا سارة وقالت"تركي..ايش فيك؟!أنا قلت لليلى ..ولو أدري إنك راح تزعل مني ما طلعت من

الأساس"

صرخ تركي"أجي البيت ألاقي زوجتي طالعة"

سارة"آسفه...إذا كان هذا يزعلك وعد ما أطلع بدون إذنك "

تركي"بعد إيش يا مدام..بعد ما سمعتني أمي كلام مثل السم"

قالت سارة بهدوء"أهااااا..قلي من الصبح ان خالتي داخله بالموضوع"

تركي"وإيش تفرق؟!"

رمت سارة الأكياس ثم قالت"لا تفرق ..انت ما تلاحظ إن أمك تتدخل بحياتنا"

قال تركي بهدوء"أمي تبي مصلحتا"

ساره"وايش مصلحتها لما تنقدني على طلعاتي و دخلاتي"

تركي "ما أدري عنك؟!"

قالت سارة بجمود"إنت ما تلاحظ إنك تسمع لأمك وتسمح لها تتدخل بحياتنا..رضى الأم واجب

وطاعتهم مفروضه لكن ما يوصل الأمر إننا نظلم ,نكذب أو نغضب ربنا..كل شي بحدود يا تركي"

قال تركي بعصبيه" والله أنتي اللي تعديتي حدودك"

سارة" إنت مستعد تحارب العالم عشان خالتي سواء على حق أو باطل"

تركي" هذي أمي ...وما أسمح لك تتكلمين عنها كذا"

قالت ساره بتسرع"إسمح لي يا تركي أنت انسان ممسوح الشخصيه عند أمك"

إقترب تركي من سارة وفجأة صفعها على خدها...تراجعت سارة وقد إتسعت عينيها .

قال تركي"انتبهي تنقديني بأي كلمة...ثم أردف الجناح هذا ما راح تطلعين منه...وملكة اختك إنسي

تحضرينها" ثم خرج وأغلق الباب بالمفتاح..دارت الدنيا بسارة وبدأت دموعها بالهطول..لم تصرخ لم

تبكي ..فما حدث فوق إستيعابها.

************************************************** ***************

انتظروني بالباااارت الثالث عشر