http://www.alqabas.com.kw/Final/News...0009_small.jpg


لا ابالغ اذا قلت هذا الشاعر ثامر شبيب الدغباسي هو افضل الشعراء الشباب بالقبيله بالسنوات الاخيره مع كل الاحترام لهم ومن افضل الشعراء بالساحه ولو انه عيبه تقصيره الاعلامي



هذا الشاعر جميل .. كلماته تدخل القلب بسرعه وسلسه


تقرى اول ابيات يجبرك تكمل لأخر بيت ودك لو فيه زيادة


اشوفه انه ظالم نفسه اعلاميا .. كنت اتمنى اشوفه بامسيه .. شاعر مثله يملك كل هالكم من القصائد المشهوره اكثر من شهرته .. استغرب منه هذا الحضور الاعلامي الضعيف ..


ثامر شبيب شاعر قادم لو اجتهد بالحضور الاعلامي .. بكون احد الشواعير الكبار وهو من نسل شواعير كبار ..



اضع بين اياديكم .. كذا قصيدة جميله له

هبــة الــريح

لاجيـت افكـر بالوجيـه المفاليـح .. وفرقت بين الناس عالـي و واطـي

فكرّت بك ضمن الوجيه المشافيـح .. متقلطـن ببسـاط ماهـو بساطـي

علاقتـي ويـاك تحتـاج توضيـح .. من شفت في بعض الامور اختلاطي

مثلك خطا يحتاج وقفـه وتصحيـح .. بيّن مثـل تفريـق ماخـذ وعاطـي

ربيت من صغري على هبة الريـح .. ولبست لي ثوبن كمومـه اخياطـي

يوم انت تلعب في يديـن المراجيـح .. انا انطح الضيفان وافرش سماطـي

ماعابني لاصرت ظمـن المجاريـح .. اغلا جروحي بين الاظلاع ساطـي

العيب لاسقت القـدم دون تصريـح .. وخليتهـا بـدرب الردييـن تاطـي

والمشكله انك تحرث النار وتصيـح .. اركد قبـل لافـك عنـك رباطـي

خابرك ماتبعـد قريـب المراويـح .. زايد عـن العالـم بكثـر الهياطـي

اكبر طموحـك لاتعطـرت بالريـح .. تطلع تمشى بين شاطـي وشاطـي

عندي سؤال وخابرن فيـه تجريـح .. لكن ضـروري تسمعـه بأنبساطـي

ارفعك بيدي لسمـا ترجـع اتطيـح .. قلي شسوي فيك لا صرت واطي .؟




مـحتاج لك


محتاج لك حيل والله يقطـع الحاجـه .. حدتني وجيت اداري دمعـة عيونـي

باين علي التعـب والضيـق وانتاجـه .. منهار لونـي متغيّـر ماهـو بلونـي

لقيتك .. اللي يصـد معقـد حجاجـه .. وانت اقرب الناس والغالي ومضنوني

سكـرت بابـك وقفلتـه بمـزلاجـه .. قدام وجهـي وكـل النـاس شافونـي

لكن على الله بديه الضيـق وافراجـه .. والا انت الله معك خابت بك ضنونـي

بلاش منك ومـن موقفـك واحراجـه .. رح واتبع اللي خذوك منـي وخلونـي

من صد عني تـرى مانيـب محتاجـه .. من دونه اعيش دامه عاش من دونـي

وان قـدر الله مـع الايـام نتـواجـه .. تمـر مثلـك مثـل ناسـن يمرونـي

في عيوني تصير ماتسـوا ولا حاجـه .. من عقب ماكنت تسوا الناس في عيوني




لاتلومنــي

لاتلومني لاجيت كلي من اقصـاي .. مافيـه غيـرك لاتضايقـت جيتـه

جيتك ولاغيرك ذكرتـه بمسـراي .. جيتك وكل انسـان غيـرك نسيتـه

جيتك وانا ماني بأنـا تايـه الـراي .. جيتك وانا مدري وش اللـي بغيتـه

جيتك وقلبي دقتـه تسبـق خطـاي .. جيتـك اقـول مفارقـك ماقويتـه

ان مر يـومٍ بالعمـر منـت ويـاي .. اشتاق لك شـوق المسافـر لبيتـه

مثل الهوا تحتاجه النـاس والمـاي .. يحتاج لـك قلـبٍ هـواك وهويتـه

دامك معي ماقصرت يـوم دنيـاي .. دامي خذيتـك وش بقـا ماخذيتـه

وانكان تنشدني بعد ليـه انـا جـاي .. ابشـر بـردٍ يقنـعـك لاقريـتـه

جيت اعترف بالفرق يا اخر منـاي .. بينك وبيـن اللـي عشانـك جفيتـه

اني ليامن جيت لك ( همك رضاي ) .. واني ليامن جيت لـه ( مالقيتـه )

لاتلومني لاجيت كلي من اقصـاي .. مافيـه غيـرك لاتضايقـت جيتـه



ضـيقتي راحـت

انا لاقلت لي شلونك وانـا ضايـق اقـول بخيـر .. مدامك سائـلٍ عنـي اكيـد ان ضيقتـي راحـت

انا من كثر ماحبـك اشوفـك فـي عيونـي غيـر .. تضيق النفس من غيرك ولامـن شفتـك ارتاحـت

احبك كثر .. ماتطـري فبالـي وتشغـل التفكيـر .. كثـر .. ماشيلـك بعينـي ونـاسٍ منهـا طاحـت

احبك كثر .. ما ادمح خطـاك ان خانـك التعبيـر .. كثر .. ماخانت الرفقـه بكتـم اسرارهـا وباحـت

احبك كثـر .. صقـارٍ تولـع فـي محبـة طيـر .. كثـر .. مادلـة الطيّـب بريحـة هيلهـا فاحـت

احبك كثر .. ماحس بشعـور انـي عليـك اغيـر .. كثر .. مازيح هالغيره عن افكـاري ولا انزاحـت

احبك كثر .. مالك داخلـي حـب وغـلا وتقديـر .. كثر .. ماغبت عن عيني ودموع امفارقك ساحـت

تصدق !! من عرفتك صرت احبك .. واكره التغيير .. وانا اللي كنت اعشق كـل نجمـه بالسمـا لاحـت

تأكد كـل ماتسئـل عـن حوالـي اكـون بخيـر .. مدامك سائـلٍ عنـي اكيـد ان ضيقتـي راحـت



الرســالة


ياللي حرمت القلب مبطي من الصوت .. لاتحرمـه هالحـيـن رد الرسـالـه

ايام عمري معـك لحظـات وتفـوت .. وش تنتظر لاضاع عمـري بدالـه ؟

يعني عشان اسمك على القلب منحوت .. ماعـاد تسئـل ليـه وش هالنذالـه ؟

ان كان قصدك شوفتي وسط تابـوت .. خلنا علـى ماقيـل كلـن بفالـه !!!

اليا طرى طاريـك حسيـت بالمـوت .. اليا متى هالحال ماهـي بحالـه .؟؟؟

من غبت وصارت غيبتك شي مثبوت .. الناس تنشـد ليـه ثامـر لحالـه .؟

زعلان حدي منك ضايـق ومغمـوت .. وكل من سئلني عنك ضقت بسؤالـه

عز الله اني معـك مانـي بمبخـوت .. امشي يمين الـدرب تمشـي شمالـه

عزآآآه يالدنيا عقب بحـت الصـوت .. صار الرجى منك ترد الرسالـه !!!!



قــلب بــدوي


ماعلي خلاف اقول اللـي ابيـه .. من فضل ربي علي انـي قـوي

الا حبك شي مـا اقـدر عليـه .. كن حبك ضيف والقلـب بـدوي

انت بس اللـي ابيـه ولا اجيـه .. عنك حظي لاوي ذراعي لـوي

صرت لي مشوار لاجيت ابتديه .. ان لقيت الدرب ضيعت الخـوي

رد يامنهـو حياتـي فـي يديـه .. لا تخلينـي وانـا لـك مهتـوي

ان خسرتك وين ابلقا لك شبيـه .. وانت من كل شي نادر تحتوي .؟

وين رايح جعل هالزول افتديـه .. وانت خابرني من البعد انكـوي

انت حتى الجرح منـك اشتهيـه .. من غلاك اضمى عذابك وارتوي

انت لا سولفـت ماكنـي هنيـه .. التزمت الصمت كنـي منطـوي

ليه اسولف لك وهي من غير ليه .. تعرف انك تطوي احزاني طوي

انت حبك شي مـا اقـدر عليـه .. كن حبك ضيف والقلـب بـدوي




مــجرد صـداقة


عادي معك أبقا وعـادي اخليـك .. مثلك مثل غيرك مجـرد صداقـه

ماشوف عندي احساس متمسكٍ فيك .. اقل مـن عـادي معـاك العلاقـه

غبتي حضرتي خافقي مايحاتيـك .. القلـب مابيّـن عليـك اشتيـاقـه

انتـى تنادينـي وغيـري يناديـك .. الحـب منـك ماسرقتـه سراقـه

لاتحسبين اللي يزعلـك يرضيـك .. ولاكـل طاقـه بتقـارن بطـاقـه

انا وبس .. اللي اجيبـك ووديـك .. وانتى على قربي تجيـك الشفاقـه

انا بديتك برجـع الحيـن وانهيـك .. انسان مثلك سهـل جـدا فراقـه

من دنيتي هالحين ببعـدك وانفيـك .. ابعيد يـااالله بعيـد كافـي طفاقـه

ادري جرحتك يوم انا قلـت‍‍‍ مابيـك .. والجرح يبطي لـو تغيـر مذاقـه

مستغربه من ايش حضرت معاليك .. هـذا سلوبـي لا نعيـت العلاقـه




عبــس

ياوقـت لاتلبـس مواعيدنـا لبـس .. كم لي وانا خايل واخايـل واخايـل
الكسر حديته على الجبر والجبـس .. والدمع حديته علـى الخـد سايـل
فل القيود وبطـل اقفولـة الحبـس .. خل الكويـت تعايـد اليـوم حايـل
اللي تشاور راعي اللبـس باللبـس .. .. تبـا تماريبـه بـنـات الحمـايـل
ام الترف والمبسم السكـر الدبـس .. عالت على قلبن لها الحـب شايـل
من يوم ماجتني تحبس الهوى حبس .. تامر علي ولسانهـا حيـل طايـل
وشلون تامرني وانا من بني عبـس .. لو يحكـي التاريـخ فيهـا قبايـل
رح قلها لو ريقي من الضما يبـس .. مانـي بـدور بالرفيـق البـدايـل
كان الزمن مايل معي وخاطره عبس .. ترى الزمن ماهو على طول مايـل
بكره تغادر ضيقة الصدر والكبـس .. بـاب الاصايـل ينفتـح للأصايـل
تلقا اليدين مكسره قفولـة الحبـس .. وتلقا الكويت مصافحه يـد حايـل




اضــحك حبيــبي

راسك علامك رافعه يـوم احاجيـك .. الضاهر اني فوق حجمـك عطيتـك

لحظه .. نبي نرجع دقيقـه لماضيـك .. بذكـرك فـي أي حـالـه لقيـتـك

كـان الضيـاع ودمعتينـك تخاويـك .. منهار وفي عـز انهيـارك خذيتـك

وارخصت عمري لجل احبك واداريك .. هدمت قصـر الـذل فيـك وبنيتـك

كـان الغـلا شمعـه تنـور لياليـك .. لو اظلمت دنيـاك جيـت وضويتـك

يالاسف كنت امدحك وافتخـر فيـك .. رفعت من شانـك وعليـت صيتـك

كنت انت .. عندي غير مقدر اخليـك .. اموت واحيا ان قلـت سـم وفديتـك

واليوم اشوفك خنـت حتـى مباديـك .. صغرت في عيني وانا اللي هويتـك

الضيـف لـو انـه عـدوٍ معاديـك .. غصبٍ عليـك تقـدره وسـط بيتـك

ياصاحبي بتمـوت مانـي براجيـك .. واشره علي انكـان حتـى طريتـك

لاصار ذل النفس فـي قلـب يغليـك .. يلعنـك ياقلـب ٍ عشقـك وشريتـك

اضحك حبيبـي دام وقتـك مسليـك .. بكره تمـوت مـن القهـر لا نسيتـك



اين هو من الاعلام اين هو من الديوان الصوتي او الكتابي .. لا اعلم


اللي اعلمه انه شاعر مبدع لا ابالغ لو اقول افضل الشعراء الشباب بالرشايدة مع كل الاحترام وتمنياتي لهم بالتوفيق مجرد رأي الخاص

وومن الافضل بالخليج

اتمنى كامل التوفيق والحضور الاعلامي القوي